Jun Migallean

Taym Pa

THREE weeks more to go, sa di pa ang away ni Filipino boxing icon Manny Pacquiao, nagkainit na usab ang mga hisgut-hisgut kon unsa gayud ka preparado ang Pacman batok sa Mexicanong Antonio Margarito karong Nobiyembre 13 didto sa Cowboys Stadium sa Dallas, Texas.

Dunay nangagpas nga delikado si Pacquiao, kay kini way tarong praktis, nagsigi lang og duwa og basketball, daghang tambungan nga okasyon, ug inconsistent usab siya sa iyang jogging kada buntag.

Gawas niini, naigo usab sa super typhoon ang Baguio City diin atoa siya karon nag-ensayo. Ang uban nagtuo usab nga tungod sa gidak-on ug gitas-on ni Margarito posibling anhi na gyud mahagsa ug makatilaw og kulata si Pacquiao.

Tiaw mo bay, ang Mexicano, gawas sa gidak-on, aduna pa gyud kini gitas-on nga 5-11, itandi ni Pacman nga 5-6 lang.

Tinuod kon kini lang ang atong basehan, tikyaob gyud si Pacquiao.

Pero kining mga nahisgutan sa unahan, pulos na naagi-an ni Pacquiao.

Niadtong 2007, sa naghinangat pa ang away niini batok ni Marco Antonio Barrera, diha siya nag-ensayo sa gym ni boxing promoter Rex “Wakee” Salud sa Punta Princesa sulod sa pipila ka semana.

Matag Dominggo, makigduwa si Pacquiao og basketball kanamong mga sportswriters sa Sugbo. Kon dili sa City Sports Club sa Ayala, anha mi sa Cebu Coliseum.

Wa kalikayi gisaway usab siya niadtong higayona, ug gani napikhan sab ang among grupo sa mga kritiko kay ngano kunong makigduwa pa gyud mi ni Pacquiao kay tingali nya kuno og ma-injured ang Pacman.

Pero sa gihapon milampos siya.

*******

Kon hisgutan nato ang gitas-on, pila ra man say deperensiya ni Margarito ug sa 5-10 nga si Oscar de la Hoya. Batok ni de la Hoya, morag boy scout si Pacquiao nga nakigbatok sa usa ka higanting cowboy. Abtik ug giminaro-an niya pag-away ang sikat ug banggiitan sa Amerika nga si de la Hoya kinsa wa kaagwanta ug sa ikawalo ka round miisa na lang sa iyang bandera.

Daghan ang di makatuo sa gihimo ni Pacquiao niadtong higayona kay bisan gani ang pipila ka mga boxing experts, di lang dinhi sa nasod kon di lakip usab sa Amerika, didto man mopabor kang de la Hoya.

Busa, kanang mga pagsaway nga nanggawas karon kabahin sa di maayong preparasyon sa Pambansang Kamao, dili pa angay ika-alarma.

Sulod ning nahabiling tulo ka semana, si Pacquiao ra ug ang iyang team maoy nahibawo sa ilang buhaton aron makab-ot ang sakto niining kondisyon sa tukmang higayon.

Kon magtarong siya og ensayo pabor siya batok ni Margarito, apan kon mokumpiyansa gani siya sa iyang pagpangandam tingali anhi na siya matikangkang.

As country’s veteran sports analyst/commentator Ed Picson says, “only Pacquiao can beat Pacquiao” atleast sa pagkakaron. You’re right, Ed. (Email add: junmigs0622@yahoo.com)