HINGPIT dang nangayo og pasaylo sa publiko ang pulis nga nag Burles King ug naniun og armas sa mga pasahero sa MV Melviric 3 Ferry niadtong Oktubre 6 sa biyahe gikan sa Danao paingun sa Isabela Leyte. Matud pa ni PO2 Rodelo Pilapil nga nakainum siya niadtong higayuna ug wa na masayud pa sa sunod nga mga panghitabo kon nganong nakahubo siya sa iyang purol ug underwear aron magpasundayag sa iyang nagbitay nga kinatawo.

Angayan natong hinunduman nga ang pag-inom sa ilimnong makahubog dili exempting circumstance sa iyang tulubagon sa nahimong kalapasan sa balaud, gani wala man sa’y nagsugo kaniya nga moinom arun mag-unay sa pagyabag sa iyang kaugalingun.

Kining maong gipasundayag nga kinaiya nakamugna og kabalaka sa tinud-anay nga kahimtang sa dagan sa pangutok ning ato karung mga sakop sa kapulisan. Hilabi na kay kini nahitabo nga lab-as pa kaayo sa panumduman sa katawhan ang natigayong massacre sa Quirino Grand-stand tungod sa naghurumentadong opisyal sa kapulisan nga si kanhi Inspector Rolando Mendoza.

Sensitibo ang katungdanan sa usa ka tigpatuman sa balaud. Gani sila gihatagan og hitsas nga training ug kagamitan sa atong kagamhanan aron ilang mahimo ang dakong tahas sa pagpanalipod sa gi-alagarang katawhan gikan sa tanang mga dautang elemento sa atong katilingban. Mao bitaw nga ang mosulod ning maong matanga sa pagpanerbisyo gikinahanglan gyud nga physically ug intellectually fit kay nagkinahanglan man sab og aplikasyon sa balaud ang maong trabaho. Apan ang pinaka-importante unya napasagdan lang ug wa kaayo matagad mao ang panginahanglan sa mapadayunon nga mental exam sa atong kapulisan nga aktibong nangatungdanan.

 

Kay simbako og tungod sa kadako sa problema nga ilang gi-atubang, inig kaliso sa turnilyo niining mga kanahan, imbis ang pusil nga gihatag sa gobyerno alang unta sa pagpanalipod sa katawhan, ang mao na mismo’y magamit aron sa pagpamusil sa mga inosenteng mga sibilyan.

Matud pa ni Provincial Police Director Supt. Erson Digal nga naghilak nga nangayo og pasaylo si PO2 Pilapil sa iyang nahimong kasal-anan ug nagmahay na kini ug nagbasol sa tanan niyang salawayong binuhatan. Apan mamahimo bang kalimtan na lang ang iyang sala tungod sa sayun nga paghimo og mea culpa dinuyugan sa inartistang paghilak-hilak?

Karon labaw sa tanan, angay tan-awon sa kinatibuk-ang police organization kining maong problema kay ang pagtumaw sa kayabag sa kinaiya ug binuhatan dili lamang isolated nilang Mendoza ug kang Pilapil. Ang mental ug neuro exam rekisito lamang sa pagsugod sa panerbisyo unya wa nay pagsubay kon anaa na sa aktibo nga pagpanerbisyo. Sa ngalan sa katawhan nga maoy gipanumpaang proteksyunan sa atong kapulisan, angay ug matarong nga i-mental exam na silang tanan alang sa kaseguruhan sa kinabag-an ug arun ang mga masakpan nga aduna na’y apan ang katambalan.