UNA sa tanan, atong klaruhon dinhi nga way kandidato si Cebu City Mayor Mike Rama sa pagka barangay kapitan ug konsehal dinhi sa dakbayan sa Sugbo karong Oktubre 25.
Matod pas mayor, ang piniliay sa barangay non-partisan, busa di siya mo-endosar bisan usa ka kandidato sa barangay.
Pero wa kana magpasabot nga wa siyay mga kandidato kay giawhag man niya ang mga botante sa pagsalindot niadtong mga kandidato nga mga palahubog, sugarol, tapulan ug kurakot.
***
Nagpakita lang kini nga nagsubay si Mike Rama sa daang matuwid ni Presidente Noynoy Aquino nga nag-ingon nga kon way kurakot, way pobre.
Ambot lang kon nganong naapil ang mga palahubog.
Nakabantay hinuon ko nga panultion sa taga Cabadiangan, “Ang tawo nga di mosubay sa tul-id nga dalan, hubog.”
***
Tinuod nga way gi-endosar si Mayor Mike Rama bisan usa ka kandidato sa barangay elections dinhi sa syudad.
Nakahibawo niana si Jinggoy Reformina ug Henry Wagas sa Zapatera.
Apan gatosan ka mga kandidato ang niduaw sa iyang buhatan kay nangayog suporta gikan kaniya.
Wa mangitang i-isa ang ilang mga kamot sa mayor apan tingali nangindahay nga dunay ikasulod sa ilang bulsa.
***
Sumala sa mga kandidato nga akong gikahinabi, dako silag gasto sa pagdagan bisan sa pagka konsehal lang sa barangay.
Poster didto, tarpaulin diri. Papilit sa ilang mga dagway nga way ganahang motan-aw. Mahilis pa kon mauwanan.
Pero daghan ang naaghat sa pagdagan kay nangita silag kausbawan ingon man tingusbawan sa ilang mga katagibalangay.
Way kalainan sa ubang mga politiko. Wa lay kwarta ang mga kandidato sa barangay.
***
Dunay 32 ka mga kandidato sa pagka barangay kapitan sa lalawigan sa Sugbo nga way kontra.
Usa ra ka boto ang gikinahanglan aron sila mapili sa pagka kapitan.
Nindot na, basta di lang sila makalimot sa pagbotar sa ilang kaugalingon karong umaabot adlawng Lunes.
***
Gidawat na ni Pope Benedict XVI ang pagretiro ni Cebu Archbishop Ricardo Cardinal Vidal ug gitudlo na ang iyang sumosunod, si Archbishop Jose Palma sa Palo, Leyte.
Apan di pa kita angayang manamilit sa tinamod ug tinahod nga arsobispo sa Sugbo kay hayan nga mohukom siya nga anhi siya moretiro uban kanatong mga Sugbuanon.Sumala pa niya, “Pag akoy dawaton sa mga Cebuanos, dito tumira.”