NANGANDAM og maayo ang Sugbo samtang nagpadung pa ang bagyong Juan dinhi sa nasod.

Layo ra man tuod ang Juan, wa gyud mokompiyansa ang mga opisyal dinhi kay bisan layo ra ang agianan, nagdala kini og uwan.

Sa wa pa ang Juan, duna nay pipila ka mga dapit sa Sugbo nga nangaigo sa landslide.

Dinhi sa dakbayan sa Sugbo, dunay mga dapit nga gipahimangnoan ang mga lumolupyo nga magbantay sa landslides.

Sama sa ubang mga metropolitan sa nasod, dunay mga lumolupyo dinhi sa Sugbo nga namuyo daplin sa kadagatan ug kasapaan.

Kon subayon ang mga sapa sa dakbayan, lisod na iphon ang gidaghanon sa mga lumolupyo nga naa nagpuyo daplin sa kasapaan.

Sagad kanila mga dayo sa lugar nga mipili sa pagpahimutang daplin sa kasapaan kay wa may nanag-iya sa yuta.

Di na sila moabang pa sa yuta nga gitarukan sa ilang mga balay.

Nakadaginot sila og maayo taliwa sa nihit kaayong kuwarta.

Samtang ang City Hall nagtutok sa mga dapit nga kuyaw sa landslides, nataligam-an kining mga dapita.

Kon magbunok ang uwan sud sa pipila ka mga oras, kuyaw kaayo nga ibanlas kining mao

nga mga tawo.

Labina kon ang baha moigo sa kagabhion.

Maayo unta kon tagdon sab sa City Hall ang ilang kahimtang.

Kay kon kuyaw ang landslide, mao sab ang baha, mokutlo og kinabuhi.

Ang baha usa ka katalagman nga naghuwat lang sa tukmang higayon.

Samtang wa pa kini mahitabo, mas maayong magplano ang dakbayan unsay buhaton aron malikay kining mga tawhana sa disgrasya.

Di maayong huwaton ang kilat una pa manguros.