WA gisalikway sa Commission on Elections Provincial Office nga mogamit og improvised balota kon maapekihan ang pag-abot sa official ballots gikan sa ulohang buhatan o kon magkuwang gyud sa mismong adlaw sa pinili-ay karong Lunes.

Si Atty. Lionel Marco Castillano, Cebu provincial election supervisor, nipasabot nga mahitabo lang kini kon way moabot nga official ballot atol sa adlaw sa barangay ug Sangguniang Kabataan (SK) elections.

Si Castillano niingon nga kinahanglang dunay pagtugot sa ilang ulohang buhatan ang paggamit og improvised ballots nga kinahanglang duna usay counter sign sa mga election officer ug municipal treasurer sa kalungsuran.

Siya namahayag nga sa nangaging mga piniliay sagad moabot ang mga election paraphernalia lima ka mga adlaw sa di pa ang gikatakdang eleksyon aron duha ka mga adlaw sa di pa ang pinili-ay han-ay na ang tanan.

Nasagmuyo siya sa kalangay sa paraphernalias.

Matod niya nga kon ang mga galamiton moabot ugma o sa Dominggo pa, uwahi na kini kaayo.

Samtang nalipay siya tungod kay ang ubang local government units (LGU) nipasalig nga mohatag og allowance nga P5,000 matag barangay alang sa mga magtutudlo aron dunay magasto sa ilang plete ug ubang panginahanglanon panahon sa piniliay. (SCG)