SIYAM ka mga tawo ang nangaangol sa disgrasya sa kadalanan sa managlahing mga lugar sa dakbayan sa Sugbu kagahapon sa buntag ug udto.
Usa ka trak de karga ang nalimbuwad samtang sa laing hitabo, usa ka Pajero nidasmag sa laing truck.
Unang nadisgrasya sa kagahapon mga alas 11:00 sa buntag diha sa subway sa may South Road Property (SRP) ang usa ka Pajero (YDH-604) nga gimaniho ni Raymundo Saniel, taga Suba, Argao, Sugbo nga nibangga sa trak de karga (YHK-110) nga nagkargag harina.
Naangol ang sakay sa Pajero nga usa ka langyaw nga si Frederick Frene, kinsa nabun-og ang ulo human mapakong. Siya gidali sa pagdala sa tambalanan.
Usa ka security guard nga si Reynaldo Areglo niingon nga kusog ang dagan sa Pajero hinungdan nga nidumbol kini sa trak.
Nisukwahi kini sa pamahayag sa driver niini nga hinay ang iyang pagpadagan.
Subay niini, usa ka truck de karga nga puno sa mga bato nalimbuwad mga alas 12:20 kagahapon sa udto diha sa may Veterans Drive, Lahug human nawad-an og brake samtang nagdulhog sa nahisgutang dapit.
Si Antonio Morga, 41, driver sa dump truck (RHC-763) taga brgy. Bacayan, dakbayan sa Sugbo, nalandig sa tambalanan human magmulo sa iyang ulo.
Ang iyang truck boy nga anak nga si Crisgie nagmulo usab sa ulo.
Si SPO1 Deonecio Galo, imbestigador sa traffic division sa dakbayan sa Sugbo nga nahinabi sa Sun.Star Superbalita, niingon nga si Morga nisulti nga gikan sila sa Brgy. Busay naghakot og mga bato.
Apan sa ilang pagdulhog diha pa lang dapit sa may Marco Polo Plaza Hotel, wa na mokupot ang brake sa moang truck hinungdan nga iya na lang kining gitimunan hangtod paingon sa ubos.
Ang iyang anak maoy nagwara-wara sa kamot niini nga nigawas sa bintana aron mapahibawo ang mga tawo sa dapit labot sa pagkawala sa brake.
Apan bisan paman niini pag-abot sa may likuon nga dalan sa Veterans Drive nalimbuwad ang truck ug gidaro niini ang usa ka Toyota nga awto kolor puti (GFN-473) nga gimaniho ni Rene Polinar, taga Mabolo, kinsa nakalingkawas sa tinong kamatayon.
Magkuha unta si Polinar sa iyang anak nga nag-eskwela sa pribadong tunghaan sa nahisgutang lugar dihang nakit-an niining nalimbuwad ang truck mao nga nipadaplin nalang siya apan naigo pa gyud ang iyang awto.
Nadasmagan usab ang Toyota Altis (GPP-672) nga gimaniho ni Allan Mendez, 47, taga Alang-alang, Mandaue city ingon man ang sakay niining katabang nga si Gina Cañedo, 27.
Ang awto nga gimaniho ni Mendez nipilit sa poste sa Visayan Electric Company (VECO) hinungdan nga na grabihan silang duha ni Cañedo.
Nangaangol usab ang duha ka mga habal-habal driver nga si Celso Malcaste, 38, taga Upper Son-oc, Lahug ug Joenel Davasol, taga Brgy. Tag-bao. Ang ilang mga motorsiklo nangaguba.
Lakip sa naangol ang usa ka Lovely Labajo, anak sa tag-iya sa karenderya sa nahisgutang lugar human naigo sa mga bato, ingon man ang ilang katabang nga si Renato Batoon, 21, taga Brgy. Sirao.
Gi-swerte hinuon si Felly Bontuyan, taga Brgy. Cantipla, kinsa nikaon diha sa dapit uban sa iyang bana dihang ang ilang gipa-parking nga multi cab (GPR-110) maoy naigo sa pagkabangga.
Si Roel Labajo, 56, dunay karenderya sa lugar nga nahinabi sa Sun.Star Superbalita, nagkanayon nga kusog kaayo ang dagan sa dump truck.
Dihang iyang nakita nga nitakilid kini, kalit lang nalimbuwad hinungdan nga napiit ang iyang katabang nga si Batoon kinsa nagluto niadtong higayuna.
Apil sa napiit ang iyang anak dihang nangalagpot ang mga dagkong bato nga gikarga.
Si Davasol nagkanayon nga igo lang siyang naka-parking sa dapit dihang naghatod og pasahero apan sa iyahang paglingi diha na sa iyang likod ang dump truck nabulintang.
Kasong reckless imprudence resulting to multiple physical injuries and damage to property ang gihikay sa kapulisan nga ipasaka batok sa driver.