BANKO sa dakbayan sa Mandaue gitulis sa upat ka wa mailhing mga tawo kagahapon sa udto.

Apan mokabat lang sa P30,000 ang nadala sa mga tulisan.

Ang pagpanulis nahitabo pipila lang ka mga adlaw human ang kadagkuan sa kapulisan nipahimangno nga nangabot na dinhi sa Sugbo ang grupo sa mga bangiitang tulisan nga gikan sa Mindanao.

Kagahapon sa udto, ang Banco Maximo nga nahimutang sa sa dalan A. Del Rosario, barangay Guizo, dakbayan sa Mandaue gitulis alas 12:50 sa udto.

Atol sa hitabo, upat ka mga kawani sa banko giila nga sila si Ritche Remulta, Roselyn Sab-a, Marichu Entienza ug ang ilang security guard nga si Ernesto Doydora sakop sa R-Mac Security Agency, nakalitan.

Sa upat ka mga tulisan, tulo lang ang ningsulod samtang ang usa nagpabilin sa gawas ug maoy nagbantay sa duha nila ka mga motorsiklo nga maoy ilang gisakyan.

Sigun sa asoy ni Doydora nga unang nisulod ang usa ka lalake nga nagpakaaron-ingnon nga customer.

Nisunod sa pagsulod ang laing duha ka mga tawo nga pulos armado og .45 kalibreng pistola dayog deklarar og tulis.

Ang mga tulisan nga nga pulos wala magtaptap sa ilang nawong Tagalog og inestoryahan.

Ang upat ka mga kawani gipasulod sa usa ka lawak diin nahimutang ang vault nga gisudlan sa kuwarta samtang gipahapa sila.

“Dili ko ka klaro sa ilang nawong, Sir, kay gipahapa man mi. Unya kon motan-aw gisagpa man ko,” asoy sa security guard.

Si Supt. Noel Gillamac, pangulo sa Mandaue City Police Office, niingon nga walay CCTV camera ang banko.

Matod ni Gillamac nga kon tan-awon ang pamaagi sa ilang pagtulis mga professional ang mga tulisan base sa kadali sa ilang trabaho nga nilanat lang og singko minutos.

Si Gillamac nibutyag nga P30,000 ra ang nadala sa mga tulisan.

Ang tulo yanong ninggawas sa banko dala na ang bag kolor itom nga gisudlan sa kuwarta.

Ang mga tulisan yanong nisibat paingon na sa barangay Centro.

Usa ka 11 anyos nga batang lalake nga diha atbang sa banko maoy nakasaksi sa hitabo.

Matod niya nga ang mga tulisan nagsakay og motorsiklo kolor itom apan wa usab siya makakuha sa plate number.

Gibutyag ni Gillamac nga sa pagkakaron aduna silay unom ka mga saksi sa hitabo samtang wa nila isalikway ang posibilidad nga mga local boy ra usab ang ningtulis tungod kay di man dako nga ang banko ang giigo.

Lakip sa ipatawag unya sa MCPO mao ang mga kawani sa banko sanglit wa usab nila isalikway ang posibilidad nga inside job ang pagpanulis.

Niadtong miaging semana usa sa upat ka mga tulisan ang niadto na sa banko aron magpakisayod kon unsa ang gikinahanglan kon mag-abli og account. Gituohan nga nagpaniid na kadto sa banko

Ang Banco Maximo adunay sangang buhatan sa Minglanilla ug Talamban, dakbayan sa Sugbo.

Wa pa matino kon si kinsa ang tag-iya sanglit usa man kini ka korporasyon.