NAKAHINUMDOM pa ba kamo sa 6 anyos nga si Nicole Ann Lino Calma nga napalgang patay didto sa GSIS Subdivision, siyudad sa Davao niadtong Oktubre 14?

Niadtong miaging adlaw, mga ginikanan sa alaut nga bata atong nakita sa tv footage sa usa ka tv station nga naghangyo nga mahatagan og hustisya ang kamatayon sa ilang anak nga babaye. Apan makuha kaha ni Nicole ang hustisya?

Ang suspek sa pagbunal og tubo nga puthaw kang Nicole mao ang 13 anyos nga lalaki nga ginganla'g Kokey.

Ang gipatay ug suspek sa pagpatay pulos mga menor de edad.

Ang suspek dili mahimong ikiha tungod kay protektado siya sa way pulos nga balaud nga gipasiugdahan ni Senador Francis "Kiko" Pangilinan.

Ubos sa balaud ni Pangilinan kadtong edad ug 15 anyos ug ubos pa niini dili mahimong ikiha. Ang mabuhat lamang sa mga otoridad nga ipa-rehabilatate ang bisan kinsang menor de edad nga nakahimo og krimen.

Mga otoridad way mahimo kay sama sa giposasan sila sa balaud ni Pangilinan.Di makalihok.

Ang di pa maayong epekto sa maong balaud mao nga makapadasig kini sa ubang bugoy nga mga bata sa paghimo og krimen total di man sila mapriso.

Apan kadtong mga kabanay sa biktima sa krimen sa mga menor de edad makalaum karon og hustisya sa higayon nga mahimong balaud ang balaudnon ni Kongresista Karlo B. Nograles sa unang distrito ning siyudad sa Davao.

Niadtong miaging adlaw, si House Assistant majority leader Nograles, kinsa usa usab ka abogado, nagpahibawo nga nagpasaka siya karon og balaudnon, House Bill 3077 nga nagtinguha nga amendahan ang Juvenile Justice Act.

Sa higayon nga maaprobahan sa kongreso, makalaum kita nga mominos ang mga krimen nga mahimo sa mga batan-ong makasasala.

Piliay

Nagkaduol na ang piliay sa barangay ug SK ug atong nakita ang mga kandidato nga migasto og dako sa ilang mga propaganda, sakyanan nga gigamit sa rekoreda, mga rally ug uban pa.

Labaw nga alegre karon ang piliay itandi sa mga nanglabay nga mga eleksiyon tungod kay mga daghan ang midagan sa posisyon nga pagka barangay kapitan ug pagka kagawad.

Ato sab namatikdan nga daghang mga kandidato sa pagka kagawad ug SK paryente ra sab sa mga kandidato sa pagka barangay kapitan.

Init sab ang piliay tungod kay duna man gani pipila ka mga barangay nga gibutang sa 'hot list' sa Commission on Elections.

Gani, aduna nay kandidato nga gipatay apan ang hinungdan wa pa hinuon masayri kun duna bay kalabutan sa piliay.

Seguridad

Human gipabuthan og bomba ang Rural Transit Bus didto sa Matalam, North Cotabato niadtong miaging adlaw migawas ang mando nga pahugtan ang seguridad sa terminal didto sa Ecoland Overland Transport Terminal. Ang paghigpit sa pagbantay kinahanglan nga matag adlaw ug di lamang limitahan sa terminal apan sa ubang public places sama sa mga shopping malls ug palengke. Mga tawong maghimo og samok mangita lang og binta makahigayon gani, tira.