USA ka pag-umangkon sa nagpapili nga barangay kapitan ang napatay sa pag-atake sa mga armadong grupo sa alas 3:30 sa kaadlawon, Oktubre 22, didto sa probinsiya sa Cotabato.
Ang kandidato samdan sab sa maong hitabo.
Nailhan sa kapulisan ang napatay nga si Baidido Macaalay samtang ang kandidato mao si Abdillah Macalaay, kasamtangang barangay kagawad sa Barangay Salat, President Roxas sa maong probinsiya.
Base sa nahagpat nga taho gikan sa Cotabato Police Provincial Office nasayran nga sayo nga nangmata ang mga biktima gumikan nangandam unta sila sa peace covenant meeting sa mga kandidato alang sa barangay ug Sangguniang Kabataan eleksiyon.
Apan kalit nga miabot ang mga armadong kalalakin-an ug gipaarakan sila.
Patay gilayon si Baidido nga natusak-tusak sa bala ang lawas samtang grabe ang iyang uyoan.
Dali sab nga misibat ang mga suspetsado sa diha nga ilang namatikdan nga nagresponde ang mga ginsakpan sa militar ug Citizen Armed Forces Geographical Unit.
Gisapupo si Kagawad Macalaay sa iyang pamilya ug gidala sa Cotabato Provincial Hospital diin anaa siya sa talandugong kahimtang nga naka angkon og samad pinusilan sa iyang likod ug tiyan.
Dako ang pagtuo ni Cotabato Governor Emmylou Mendoza nga politika ang motibo sa hitabo gumikan midagan pagka-kapitan si Kagawad Macaalay. (Edgardo Fuerzas)