DETACHMENT sa Alpha company sa 69th Infantry Battalion sa Philippine Army ang gilabayan og granada sa mga gituohang sakop sa rebeldeng New People's Army didto sa may Barangay Dalisay, siyudad sa Panabo, Huwebes sa hapon.

Sumala ni Alexander Serano, hepe sa Panabo City Police Station nga wa matinong gidaghanon sa mga rebelde ilawom sa tropa ni Kumander Parago sa Pulang Bagani Command 1 sa New People's Army ang gikatahong milabay og granada sa maong detachment pasado alas 5:00 sa hapon.

Hinuon abtik nga nakabantay ang mga naka-posting nga mga sundalo ug wa nakaatraka ang mga rebelde.

Way gikatahong samdan sa tropa sa gobyerno ingon man sa mga sibilyan ug mga propedad atol sa pagbusikad sa granada.

Gisulti ni Serano nga mga liquidation squad sa NPA ang ilang gituohang mihimo sa nahisgutang paglabay og granada.

Giklaro sab ni Serano nga way kalabutan sa eleksiyon ang nahisgutang hitabo.

Mga tropa sa kapulisan ug kasundaluhan doble alerto ang gipatuman aron dili masubli ang maong hitabo ug way madamay nga mga sibilyan.

Hot-pursuit operation ang gilusad karon sa mga otoridad aron sa paggukod sa mga suspek. (Marvin Pineda)