USA ka security guard ang gidagit sa duha ka wa mailhing mga armado samtang nangampanya siya kauban ang iyang gidapigan nga kandidato niadtong Huwebes.
Ang insidente nahitabo didto sa Barangay Kilate, distrito sa Toril, siyudad sa Davao.
Gidagit mao si Felix Langtad, 32, ulitawo, security guard sa St. Peter's College Toril ug nagpuyo sa Jupiter Street, Sapa, Barangay Crossing Bayabas, distrito sa Toril.
Si Langtad gitionan og armas sa mga armadong tawo, gigapos ug gipasakay sa usa ka motorsiklo sa alas 4:45 sa hapon apan gibuhian siya sa sayong kagabhion sa samang adlaw didto sa Barangay Bato, distrito sa Toril.
Base sa blotter sa Toril Police Station, ang biktima mikuyog sa iyang usa ka higala ug ni Liberty Cerdea kinsa nagpapili isip kapitan didto sa Barangay Kilate.
Giingon nga samtang nangampanya sila, dunay duha ka mga tawo nga naglingkod sa tindahan ug nangutana kung nag-unsa sila sa maong dapit.
Nagkainitay ang duha ka grupo mao nga mikuha og bato ang higala sa biktima ug gilabay ang duha ka mga tawo hinungdan nga gitionan sila og armas.
Dihang gigapos sa duha si Langtad, si Cerdea lakip ang higala sa biktima daling misakay sa ilang sakyanan dayon mipauli sa ilang balay.
Si Cerdea kinsa ginapos ang mga kamot, gipasakay sa mga armado sa motorsiklo nga gimaneho ni Adonis Powao.
Si Powao giingon nga gitionan og armas sa mga armado ug gimandoan nga ihatud sila si didto sa Sitio Banas, Barangay Bato.
Mga armado nagmando sa drayber nga di mosunod kanila kay kung himuon kini sa drayber, ilang patyon ang biktima.
Ang biktima uban sa mga armado naglakaw sa maong lugar sulod sa tulo ka kilometro, apan tungod kay gabii naman, gibiyaan nila si Langtad.
Didto na nakahigayon ang biktima sa pagpangita og motorsiklo nga masakyan pauli sa ilang balay.
Ang biktima nagbutyag nga way intensiyon ang mga armado nga dagiton siya, apan nahimo kadto nila tungod sa ilang kalagot sa mga kauban niini nga sila Cerdea. (AD)