HUMAN gipatuman sa Commission on Elections (Comelec) ang total gun ban, 13 na ka mga tawo ang nasikop sa Davao City Police Office (DCPO) dinhi sa siyudad sa Davao.
Kini ang gipahibawo ni DCPO director Rene Aspera atol sa gihimong press conference didto sa Task Force Davao.
Si Aspera nagsulti nga sukad nila gipatuman ang gun ban niadtong Septyembre 25, ang ilang nasikop pulos mga sibilyan.
Siya nagsulti nga way sakop sa kapulisan ug militar ang milapas sa gun ban.
Ang maong opisyal nagbutyag nga ila nang gipasaka ang kaso ngadto sa korte batok sa mga suspetsado.
Si Jose Jorge Corpuz, assistant regional director for administration sa Police Regional Office 11, nagbutyag nga 33 na ka mga tawo ang ilang nasikop sukad gipatuman ang gun ban sa rehiyon 11.
Siya nagsulti nga sa kinatibuk-ang ihap sa mga nasikop, 32 kanila mga sibilyan samtang usa ang barangay kapitan.
Si Corpuz nagpahibalo nga 23 ka mga armas ug 17 ka mga hait nga hinigiban ang ilang nasakmit sukad nila gipatuman ang gun ban pinaagi sa pagmuntar og checkpoint.
"The police already filed 19 cases against the violators of the election gun ban region-wide," pung ni Corpuz.
Sa laing bahin, si Aspera nagbutyag nga di makontrol sa kapulisan ang mga tawo nga maghupot og armas bisan pa man sa hugot nilang gipatuman ang gun ban.
"We cannot control the mind of the criminals. Binabantayan din nila (criminals) ang ating kapulisan kaya may nangyaring mga shooting incidents," pung ni Aspera dihang gipangutana kung unsa ang iyang reaksyon sa sunod-sunod nga pagpamusil patay dinhi sa dakbayan.
Samtang nagpadayon ang kampanya, usa lamang ka kandidato dinhi sa siyudad ang gipusil patay sa wa mailhing mamumuno.
"We consider the incident as plain murder case and we are still validating the motive behind the crime," pahayag ni Aspera bahin sa kamatayon ni Ariel Tolibas, kandidato sa pagka-barangay kagawad didto sa Barangay Indangan, distrito sa Buhangin. (AD)