NAGTAOP ang kutsilyo sa ubol-ubol sa biktima dihang napalgan nga wa nay kinabuhi sa alas 8:00 sa buntag niadtong Huwebes.
Ang biktima nagsandig sa punoan sa kahoy nga Ipil-ipil kilid sa gamay nga sapa didto sa Purok 21, San Roque, distrito sa Calinan, siyudad sa Davao.
Human sa pipila ka oras nga pagsusi sa kapulisan, ang biktima nailhan sa pangalan nga Andres Agay, 40, minyo, trabahante sa Stanfilco ug nagpuyo sa Purok 1, Barangay Gumalang, ning siyudad.
Si SPO1 Olando Madrazo sa Calinan Police Station nagbutyag nga ang biktima nadiskubrehan ni Edgar Baguio, coconut harvester sa maong lugar.
Matud ni Madrazo nga gituyo gayud sa mamumuno nga gipataop ang kutsilyo sa ubol-ubol sa biktima aron masiguro nga di na mabuhi.
Ang patay'ng lawas sa biktima gipahiluna sa punerarya sa Calinan samtang padayong naniid ang kapulisan aron mailhan ug masikop ang mamumuno.
Sa laing bahin, usa ka menor de edad ang gitigbas sa wa mailhing tawo sa alas 11:00 sa gabii niadtong Huwebes didto sa Sta. Catalina, South Bay, Barangay Lapu-lapu, ning siyudad.
Ang biktima mao si Marlon Balmori, 14, nagpuyo sa Davao Farms Subdivision, Barangay Lapu-lapu.
Si Balmori nakaangkon og samad tinigbasan sa iyang walang nawong ug tuong abaga mao nga gidala siya didto sa Southern Philippines Medical Center (SPMC).
Gipangita na sa kapulisan ang tawo nga mitigbas sa biktima kinsa nakig-istorya lamang sa iyang mga higala didto sa maong dapit. (AD)