UGMA SA GABII na ang kinamangay. Kini maoy panultion nga sagad madungog matag eleksyon. Ang ilang gipasabot nga kpng gusto sa usa ka kandidato nga makabentaha sa resulta sa eleksyon, kinahanglan nga di siya magsalig sa gidaghanon sa iyang nakuha nga suporta panahon sa kampanya. Kinahanglan nga kamangon pa gyud sa iyang mga tawo kadtong wa pa maka hukom og kadtong tua na mopabor sa iyang kuntra. Natural, kay kamangon man magdala gyud ka og bawon para ipang apodapod sa mga gipangkamang. Kataw-anan apan mao ni tinuod mkatag bisperas sa eleksyon. Gani daghan ang napildi tungod aning kinamangay. Pasulti-a ra gud nang mga pildero sa eleksyon sa niaging Mayo di ba usa sa ilang napildihan mao ang grabing kinamangay nga gihimo sa ilang kuntra. Unya ra ba epektibo kaayo kining maong paagi kay daghan sab sa atong mga botanti gusto man nga magpakamang. Comelec wa bay balaod nga magpahamtang og silot aning mangamangay? Adto sa womens desk posibling makasuhan ka kong masakpan unya ireklamo nga nangamang og babayeng silingan.
MAGPAKAMANG
Manghinaot ta nga ning eleksyona atong butangan og period kining tradisyon sa kinamangay. Gawas nga kinaraan na kaayo, makauuwaw sab kaayong hunahunaon nga ikaw nagpakamang. Kay nagpakamang siguradong dunay cashabutan. Mao ni ang inyong ipasunod sa inyong mga anak, sa inyong mga apo o kadugo? Kadtong di gustong kamangon pagpabukal mo daan diha og ininit tubig tagana sa mga mangamangay. Di para painit, kun di para sabyag.
MAHINAYON
Kong si Atty. Lionel Marco Castillano ang pasultion, wa nay makapugong sa eleksyon karong Lunes. Apan sa dihang ako siyang gipangutana kong ang bagyo may katakus ba nga mosanta sa eleksyon karong Lunes ang iyang tubag, mahimong way eleksyon kong di mahatagan og katumanan ang gawasnon og malinawon nga pagboto. Ibutang nato malinawon kaayo karong Lunes, way goons, og way manghudlat, pero kong magpungasi sab ang dautang tiempo, pananglit bagyo, si Castillano mipasabot nga mahimong i-uswag ang petsa sa piniliay kung delikado alang sa mga botanti ang pag gawas sa ilang balay aron moboto. Kong bagyohon og kuarta kaha aron ipamalit og boto? Sigurado sab ko nga magtimi timi sab ang uban sa pagboto kay nagpaabot kanus-a iawara wara ang tag dosentos ngadto sa tag kinyentos.
PAHALIPAY
Congrats kang Engr. Preciosa Maturan, pagkapili niya nga usa sa napulo ka Outstanding Rural Women atol sa kasaulogan sa International Rural Women Day. Ang pagpasidungog gihimo didto sa kaulohan. Samtang si Aga og Monique Mascara og ilang anak nga si Nika, uban kang Mama Nating magsaulog sa kapistahan sa Birhen Sa Fatima karong udto sa ilang panimay sa Fatima Valley, Pagsabungan, Mandaue City. Happy Fiesta sa tanan gikan ni John Mascara, Anne Nadela, Noel Villaceran og staff sa Famas.