NUNOT sa unang tikang inig gawas, hinaot dili ta matikangkang. Impas gyod tanang utang kon kalimot ta’g panguros ug wala’y panumbaling sa gahaguros ang mga sakyanan.
Bisan wala’y hunong ang gahadla nga hudlat sa kadalanan, lagmit dili na ta makurat ining sagad natong nasayran nga kakuyaw.
Bitaw, mora’g di molabay ang adlaw nga wala’y gikatahong mga nadedbol ug naangol gikan nabanggaan ug naligsan.
“At least two vehicles in a major highway in the Philippines get involved an accident every hour. Fifty road accidents occur every day.”
Kini mao’y gipadayag sa Coalition for a Safer Philippines nga gapasiugda sa kalihokan nga Ingat Pilipinas. Gipakatap niining maong hugpong ang paghimatngon alang sa kahilwasan sa kadalanan aron mokunhod ang gidaghanon sa mga mga dili matag-an. Bisan mahimo untang pugngan nga panghitabo, labing dali ug sayon ang ulahing pagbasol gikan sa kadanghag ug kayam-angan pagsunod sa mga lagda sa trapiko.
“Misery loves company,” matod sa usa ka Iningles nga panultion. Bitaw, wala tuod mag-inusara ang Pilipinas kabahin sa mga disgrasya diha sa kadalanan. Kay utro pod nga wala pa makat-on og tagam ang kasagaran sa mga galisod nga nasod sa tibuok kalibotan unsaon paglikay sa katalagman. Kini labaw pa, sumala sa panukiduki sa United Nations (UN), kon itandi sa gidaghanon sa mga natipi gumikan sa balatian sama sa malaria.
Kining paturagas sa kadalanan mao pod ang ang gaunang hinungdan sa pagkatodas sa kabatan-onan. Luoy ug usik gyod kaayo kay daghang nakalas ang kinabuhi duol sa ilang mga tunghaan. “Every year, around 80,000 children aged 5-14 in developing countries lose their right to education for a single tragic reason: they are killed on the roads, often making the journey to school,” matod pa ni Dr. Kevin Watkins, usa ka opisyal sa UN.
Dinhi sa atoa, giumol sa Land Transportation Office (LTO) ang usa ka Regional Council for Road Safety nga gilangkoban sa laing mga gaway sa kagamhanan. Nunot sa mga gasunod-unod nga mga disgrasya sa kadalanan, kining konseho sa LTO buot magpasiugda og mga pagbansay-bansay ug pagpahigayon og mga seminars kabahin sa maayong pagsunod sa mga lagda sa trapiko ug pag-atiman sa mga sakyanan. Ang kaigmat sa pagpatuman sa “road safety” mao po’y katuyoan sa kahugpongan nga Federation of Auto Clubs Cebu (FACC).
Kon duna ba gyo’y layo nga padulngan ang gitinguhang kausaban alang sa luwas nga kadalanan, mamasin ta nga unta kining mga lakang nga gilaraw dili mahisama sa gaduhiraw nga patid-patid og lata.
(geemyko@gmail.com)