ELEKSYON na sa Lunes, apan karon pa gitakda ang pagpangabot sa kompletong election materials.

Daghan kaayo ang nangasagmuyo nga municipal treasurers sa Sugbo tungod sa kalangay sa pag-abot sa election materials tungod kay di lalim ang pagpanghatod niini sa lagyong mga lugar.

Seguradong maapektuhan ang pagpangandam sa lagyong mga dapit, sama sa mga isla sa Bantayan ug Camotes.

Lakip sa maigo og maayo mao ang mga bukirang dapit sa lalawigan sa Sugbo nga lisod kaayong abton sa yano nga mga transportasyon.

Nakapaabot na ang Commission on Elections sa posibleng kakuwang unya sa election materials busa nagtugot na silang daan nga mamahimong makagamit sa improvised ballots.

Kining kalangay karon sa pagkahuman sa election materials linugdangan sab sa kadugay nga nakahukom sa administrasyon ni Presidente Benigno Aquino III kon ipadayon o iuswag ba ang eleksyon.

Naa man guy lakang ang ubang mga magbabalaod nga mag-oktaba unta sa eleksyon tungod sa kaduol ra sa barangay ug national elections.

Apan dihang niinsister na gyud ang presidente nga gusto siyang mahinayon ang eleksyon karong tuiga, nangahilom silang tanan.

Sa wa lang damha, ang paglangaylangay sa mao nga desisyon misangko sab sa pagkalangay sa pagpahigayon sa Comelec sa pagsubasta sa mga material alang sa election.

Ang kalangay dako na kaayo og epekto sa pagpangandam ug sa pagpahigayon sa election. Susama ni sa domino.