ANG Commission on Elections (Comelec) en banc niluwat og resolusyon aron pagresolbar sa problema bahin sa pagkalangay sa pag-abot sa mga ballot box ug ubang election paraphernalia, ilabi na kon magkuwang ang supply atol sa adlaw sa piniliay.

Sa sayo pa, wa gisalikway sa elections officials ang paggamit sa improvised ballots kon magkuwang ang supply niini.

Kini taliwa kahagip-ot sab sa panahon sa pag-apod-apod niini.

Gipagawas ang resolusyon aron magiyahan ang mga election officer sa unsay angay buhaton sa higayon nga masugatan ang maong problema nga sagad motumaw panahon sa eleksyon.

Si Atty. Lionel Marco Castellano, Cebu Provincial Election Supervisor, subling niangkon nga apeke na gyud sila sa panahon pag-apod-apod sa kagamitan sa eleksyon tungod sa kalangay pag-abot niini gikan sa kaulohan.

Hinuon, karong adlawa gipaabot nga mangabot ang tanang election paraphernalia basi usab sa pamahayag sa ilang labaw sa Comelec.

Apan ang ubang mga municipal treasurer nga wa makapugong, nipadayag sa ilang kasagmuyo tungod kay hangtod kagahapon wa pa gihapon mangabot ang ubang election paraphernalia.

Nagtuo silang maapekihan na sila sa oras sa pag-apod-apod niini.

Mga municipal treasurer sa mga lungsod sa San Francisco, Tudela ug Poro sa isla sa Camotes, Daanbantayan, Argao ug Sibonga ang sayong nangabot kagahapon sa kaadlawon aron makauna unta pagkuha sa ilang election supplies.

Si Cleofe Gonzaga, officer-in charge sa Provincial Treasurer’s Office nasagmuyo sa maong kalangay kay seguradong magkara-kara sila pag-apod-apod sa mga ballot box ug ubang election paraphernalia.

Apan bisan pa sa maong problema gipasalig ni Castellano nga andam na sila pagpahigayon sa pinili-ay karong Lunes.

Siya nanghinaot ga way masugatan nga dagkong problema atol sa adlaw sa pinili-ay. (Sheila C. Gravinez )