GIKONSIDERAR sa Mandaue City Police Office (MCPO) nga sulbad na ang tulis sa Banco Maximo niadtong Huwebes human nga usa sa upat ka mga suspek nasikop na sa kapulisan samtang motorsiklo nga gigamit sa tulis nakuha.

Ang suspek bag-o lang nakagawas sa bilanggoan ug giingong suod nga higala ug bata-bata sa gipatay nga si Crisostomo Llagono, alyas Tata Negro.

Niadtong Huwebes gitulis ang Banco Maximo nga nahimutang sa A. Del Rosario st., Brgy. Guizo sa upat ka mga tawo.

Nadala ang P30,000.

Sa gihimong follow-up operation sa mga sakop sa Investigation Detective Management Branch (IDMB) pinangulohan ni Insp. Ramil Morpos, ilang nasikop ang usa ka Michael Labora, 31, taga B. Rodriguez ning siyudad, apan kasamtangang nagpuyo sa Brgy. Upper Tabok.

Matod ni Morpos nga human gyod sa tulis nakadawat gilayon silag impormasyon gikan sa ilang asset nga aduna silay nabantayang upat ka mga tawo nga kadudahan ang linihukan.

Tulo na kini ka mga buwan nga nagpuyo sa usa ka balay nga giingong ilang giabangan.“Morag nagduda sila kay moulig gabii unya usahay wala diha inig kabuntag,”asoy ni Morpos nga nahinabi sa Sun.Star Superbalita.

Kagahapon sa hapon ang mga sakop sa IDMB niadto sa dapit ug nasikop si Labora apil na ang usa ka motorsiklo nga walay plate no. nga kolor itom

Sa pasiunang imbestigasyon nihimakak ang gikatahapan nga apil siya sa tulis sanglit ng iyang motorsiklo igo lang giabangan.

Apan ang saksi nga menor de-edad ug ang teller nga si Marichu Entienza positibong niila kang Labora nga maoy nagsilbing lookout ug drayber sa usa ka motorsiklo nga gisakyan sa mga tulisan.

Dugang nasayran sa kapulisan nga si Labora tulo na ka buwan gikan nakagawas sa Cebu City Jail.

Samtang naila usab kini nga bata-bata sa gipatay nga kandidato sa pagka-konsehal sa dakbayan sa Sugbo nga si Tata Negro.

Gumikan niini, gikonsiderar sa kapulisan sa Mandaue nga sulbad na ang tulis samtang lakip sa ilang gisusi kon ang maong mga suspek mao ra ba usab ang nitulis sa LBC Padala sa may A.C. Cortes, Brgy. Ibabao nga gitulis niadtong Sabado.

Samtang padayon pa ang ilang imbestigasyon aron masikop ang lain pang tulo ka mga responsable.