HUMAN sa ilang kalipay sa pagtagay sa lawasnong kahidlaw, usa ka babaye nga nagbaligya sa iyang unod gidunggab makadaghan sa iyang kustomer kagahapon sa kaadlawon sulod sa usa ka lodge sa Colon street, Brgy. Parian, dakbayan sa Sugbo.

Si Mary Ann (tinuod ngan gipugngan), 32, dalaga, nagpuyo sa Citi Center sa Brgy. Kamagayan ning dakbayan, nakaangkog di mominos siyam ka mga samad dinunggaban sa nagkadaiyang parte sa lawas.

Hubo siya sa tibuok lawas dihang napalgan sa mga tawo sud sa kuwarto.

Ang suspek kinsa giila lang sa ngalan nga si “Zaldy” nikaratel sa pagdagan gawas sa lodge nga hubo ang tibuok lawas nga wa na maabti pa sa nigukod nga mga bugaw ingon man sa mga pulis.

Si PO3 Victor Ayuman, imbestigador sa Homicide Section sa Cebu City Police Office (CCPO)nga nahinabi sa Sun.Star Superbalita, nagkanayon nga niangkon si Mary Ann nga usa siya ka bayaran sa ilang dapit.

Niabot ang suspek nakigsabot gilayon niya ug sa bugaw nga ginganlang lang og “Bobong.”

Dihang nilampos ang ilang transaction, nanakay gilayon silag traysikad ug nagpahatod sa usa ka lodge sa dalan Colon, dayon nagtagay sa lawasnong kahidlaw.

Matod pa ni Ayuman nga ang biktima nitug-an nga dihang nahuman na sila sa suspek sa ikaduhang “himaya sa kalipay” kalit lang kining nag-wild, nikuhag kutsilyo dayon gidunggab siya sa makadaghang mga higayon sa nagkadaiyang parte sa lawas.

Ang biktima giingong nanglimbasog sa pagpanalipod sa iyang kaugalingon nga nagpangayog panabang sa mga tawo sa lodge samtang ang suspek nikaratel usab sa pagdagan sa gawas nga naghubo ug wa na gyud madakpi.

Ang kawani sa lodge nagkaguliyang sa pagtabang sa biktima ingon man bugaw nga kuyog niini nga nagpaabot sa gawas sanglit wa pa usab mabayri sa suspek.

Sumala pa niini nga nahabilin ang underwear sa suspek, t-shirt, shorts, ingon man ang mga sapot sa biktima.

Narekuber ang usa ka Swiss knife nga nabali didto sa sulod sa lawak sa maong lodge.

Ang biktima gidali sa pagdala ni Bobong sa Cebu City Medical Center (CCMC). Hinuon nakagawas sa tambalanan kagahapon bisan paman sa iyang mga samad nga naangkon.

“Wala kaayo motug-an sa tanang detalye ang biktima nganong gidunggab siya. Dunay siguro gitaguan. Kalit lang daw nga nag-wild ang suspect human sa ikaduha ka round nilag torjak,” sumala pa ni PO3 Ayuman.

Hinuon wa niya gisalikway ang posibllidad nga nagkalalis ang biktima ug suspek nga posibling nihangyo sa laing round unya gibalibaran.

“Marunong baya kaayo nang mga bayhana. Dili baya mosugot nga moderetso lang sa pag-rebansi nga walay bayad daan. Posibli mao toy ilang gi-awayan. Wala lang na siya motug-an sa tanang hitabo,” dugang ni Ayuman.

Kagahapong adlawa ang biktima nipatim-aw sa Homicide Section uban sa mga kabanay niini mga Brgy. Tanod sa Parian.

Sumala pa ni Sr. Insp. Gocotano, hepe sa Homicide Section, nga dunay nakaila sa suspek nga ginganlan lang og “Zaldy” nga taga Brgy. Parian, hinungdan nga gitambagan nga pabalikon sa Martes aron mapadali ang pagpasaka sa kaso tungod kay way opisina karong adlawa.