NATUSAK-TUSAK sa bala ang lawas sa kanhi sekyu ug namatay alas 8:15 sa buntag kagahapon didto sa dalang Mirafuentes, siyudad sa Tagum.
Ang biktima giila sa pangalang si Edmund Armamento, 33, molupyo sa Purok 3, Rattan, Barangay Apokon sa maong siyudad.
Nakahiagum ang biktima og lima ka mga samad pinusilan gamit ang kalibre .45 nga pistola kon diin ang upat nga igo naglinya sa tiyan padung sa dughan ug ang gituohang mitiwas sa biktima mao ang igo sa likod nga bahin sa iyang ulo.
Sa imbestigasyon sa kapulisan, nasayran nga ang biktima nagmaneho sa iyang motor sa nahisgutang dalan ug paggawas na unta sa highway.
Apan pag-abot na sa atubangan sa balay sa kanhi konsehal sa siyudad nga si anhing Fortunato Dayot, dunay duha ka suspek nga nag-atang nang daan ug mipusil kaniya hinungdan sa pagkatumba sa motor.
Mga suspek miduol ug gitiwasan ang biktima. Daling misibat mga suspek sakay sa ladies type nga motor nga walay plaka.
Mga operatiba sa Scene of the Crime Operatives pinaagi sa pagpanguna nila ni Senior Police Officer 2 Romeo Obero ug sa hepe niining si Chief Inspector Virginia Gucor, igo na lang mihipos sa 4 ka basiyo ug lima ka mga balines sa kalibre .45 nga pistola.
Sa kasamtangan, padayon pang gisuta sa mga pulis ang motibo sa pagpamusil ug pag-ila sa mga suspek sa krimen. (Teddy Cabana)