NAGPAGAWAS og P100 mil si Cotabato Governor Emmylou Talinio Mendoza isip ganti sa mga tawo nga makatudlo sa mga suspek sa pagpamomba sa Rural Transit Bus nga mikalas og napulo ka kinabuhi ug 31 ang naangol niadtong Huwebes sa buntag.
Gibutyag ni Cotabato Police Provincial Director Cornelio Salinas nga ila na nga nailhan ang usa sa tulo ka mga tawo nga maoy nagbilin og improvised explosive device (IED) sa bus nga hinimo sa bala sa 81 mm mortar.
Gidugang ni Salinas nga ang mga suspetsado positibong mga miyembro sa mga local recruit sa teroristang Jemmaah Islamiyah.
Atol sa pakigpulong ni PNP Chief Director General Raul Bacalso sa mga lokal opisyal sa North Cotabato, uban ang kapulisan, militar, mga operator sa bus ug sa L300 van, gitutukan nila kon unsaon ang pagpatuman og hugtanon nga seguridad batok sa mga dautang grupo.
Gitudlo sab ni Bacalso si Supt. Alexander Tagum, hepe sa gimugna nga Task Force Rural, aron mangunay sa paglutos sa mga suspek ug hugtanon nga imbestigasyon sa pagpamomba.
Hangtud karon mas gipahugot pa ang seguridad sa nagkadaiyang dapit didto sa Central Mindanao gumikan sa mga nadawat nga hulgang pagpamomba kon diin target ang mga bus terminal, merkado publiko ug mga tulunghaan.
Tumong sa maong grupo nga gubton ang mahitabong barangay ug Sangguniang Kabataan election ug ang pagsabotahe sa subling pagbukas sa hinabing pangkalinaw sa Mindanao tali sa gobyerno ug sa Moro Islamic Liberation Front. (Edgardo Fuerzas)