GI-ATAKE sa mga miyembro sa New People's Army (NPA) ang posisyon sa militar sa alas 7:10 sa gabii niadtong Biyernes didto sa probinsiya sa Cotabato.

Gibutyag ni Colonel Benjamin Hao, hepe sa 6th Infantry Division, nga gipabuthan sa mga rebelde ang gikampuhan sa mga sakop sa 39th Infantry Battalion sa Philippine Army, duol sa barangay hall sa Barangay Batasan, Makilala.

Apan dali kining nabantayan sa mga sundalo hinungdan nga nagpabuto sab sila sa ilang mga armas isip balos sa mga walhong grupo.

Walay nasamdan sa bahin sa mga sundalo samtang dili matino sa mga NPA sa diha nga miatras sila pasaka sa Mount Apo sa dihang nahiabot ang dugang puwersa sa kasundaluhan.

Matud ni Hao, nga demoralisado na ang hut-ong sa mga komunista gumikan sa gipalapdan nga Civil Military Operation (CMO) sa kasundaluhan aron pasabton ang katawhan sa dautang epekto sa pagsuporta sa mga rebelde.

Gikompirma ni Hao nga hangtud karon padayong nangrekrut og mga menor de edad ang mga NPA sa mga hilit nga dapit sa North Cotabato, Sultan Kudarat ug mga utlanan sa Bukidnon, Davao del Sur apil na sa siyudad sa Davao.

Miangal pag-ayo ang mga sibilyan sa grabeng pagpangayo og revolutionary tax sa mga NPA nga daw gitulis na sila. (Edgardo Fuerzas)