GIPAHUGTAN na sa Davao del Sur Provincial Police Office (DDSPPO) ang seguridad human sa nahitabong pagpamomba sa Matalam, North Cotabato niadtong Huwebes.
Gawas sa maong hitabo, gipaalerto sab ang otoridad aron nga bantayan ang himuong eleksiyon sa barangay ug sa Sangguniang Kabataan (SK) ugmang adlawa.
Si Ronal dela Rosa, provincial police director, nagmando sa tanang hepe nga mohimo og patrolya ang kapulisan ingon man pagmuntar og mga checkpoint sa mga nag-unang kadalanan.
Sa siyudad sa Digos, gipahugtan sa kapulisan ang seguridad sa Digos Overland Transport Terminal human gibombahan ang Rural Transit Bus dito sa Matalam.
Kahinumdoman nga 10 ka tawo ang namatay samtang daghan ang naangol sa maong insidente.
Gikan sa siyudad sa Cagayan de Oro ang bus ug padung unta sa dakbayan sa Tacurong.
Hugot nga inspeksyon ang gipatuman sa mga pulis ug way gipiling mga pasahero aron nga way makalusot nga mga katingad-ang mga bagahe.
Nagpahimagno sab ang kapulisan ngadto sa mga drayber nga mohimo og kaugalingong paghiling sa mga bagahe aron di matamnan og bomba.
Nakatilaw na sa kabangis sa teroristang grupo ang probinsiya human gibombahan kaniadto ang lungsod sa Bansalan ug siyudad sa Digos.
Apan giklaro ni dela Rosa, di lang mga teroristang grupo ang ilang bantayan sanglit ugma na ang eleksiyon.
Nangayo sab ang kapulisan og kooperasyon sa katawhan pinaagi sa pagtabang pagpaniid sa mga tawong katingad-an og lihok aron nga malikayan ang mga dautang hitabo. (Dondon Dinoy)