NAG-INUSARANG Pinoy na lang ang Sugbuanong si Warren “Warrior” Kiamco human niya gipukan si David “El Matador” Alcaide sa Spain, 11-5, kagahapon sa 35th Annual US Open 9-Ball Championship sa Chesapeake Conference Center sa Virginia, USA.
Ang lumad nga taga Pasil, Cebu magsagubang gyud og grabe ka kulbahinam nga sitwasyon kay gawas sa pressure nga siya na lang ang nahabiling Pinoy, naa pa gyud siya sa loser’s bracket kasamtangang nagkampanya.
Usa na lang ka pildi ug manamilit na sab siya sunod sa ubang mga Pinoy nga ningsalmot sa kompetisyon, nga magdalig og $40,000 nga ganti sa kampiyon.
Unang nakatilaw og pildi si Kiamco batok kang kanhi US Open 9-ball ruler Corey “The Prince” Deuel (11-10) sa 5th round sa winner’s bracket.
Sa loser’s bracket, gipalagpot ni Kiamco sila si American Tommy Kennedy (11-8), kababayang si Efren Bata” Reyes (11-4) ug Chinese Lo Li_wen (11-9).
Sa sunod niyang tahas, makigsangka siya pagbalik kang Deuel.
“Sana manalo si Warren (Kiamco),” matod sa manager sa Sugbuanon nga si Jonathan Sy, presidente sa Negros Billiards Stable (NBS) ug tsirman sa bag-ong natukod nga National Collegiate Billiards League (NCBL), sa usa ka news release pinaagi sa email.
Sa laing bahin, mag-engkuwentro semi-finals sa winner’s bracket sila si Mika “The Iceman” Immonen sa Finland ug Darren “Dynamite” Appleton sa Great Britain.
Ang modaog ning sangkaa mao ang unang makasulod sa finals samtang ang mapilde makigbatok sa modaog nila ni Kiamco ug Deuel aron ilugan ang ikaduhang puwesto sa finals.
Ang ubang mga Pinoy nga nangapil sa kompetisyon mao sila si Francisco “Django” Bustamante, Jose “Amang” Parica, Alex “The Lion” Pagulayan.
Naa sab sila si Ronato “Volcano” Alcano, Dennis “Robocop” Orcullo, Roberto “Pinoy Superman” Gomez, Antonio “Nickoy” Lining, Lee Vann “The Slayer” Corteza, Ramil “Bebeng” Gallego, Santos Sambajon, Jundel Mazon ug Edwin Montal.