GIKATAKDANG moabot karong adlawa dinhi sa Sugbo ang kontra ni AJ “Bazooka” Banal sa ALA gym sa main event sa umaabot nga “Pinoy Pride” boxing promotion.

Ang abyon nga gisakyan sa kanhi two-time world champion nga si Luis Alberto Perez ug kaubanan nakaeskedyul nga motugpa sa Mactan International Airport sa ala 1:50 sa hapon.

Gianggaan og “El Demoledor” nga nagpasabot og demolition man, si Perez makigharong kang Banal karong Oktubre 30 sa Waterfront Hotel sa Lahug, Cebu City.

Kauban sa Nicaraguan nga boksidor mao ang iyang trainer nga si Mario Antonio Garcia Fonseca ug manager Luis Reynaldo Mendoza.

Si Perez (26-4, 17KOs) miangkon sa labing una niyang world title pinaagi sa split decision nga kadaugan batok kang Felix Mechado sa ilang IBF super flyweight title bout niadtong 2003.

Iyang nadepensaan ang iyang titulo sulod sa tulo ka higayon batok nila ni Mechado, Luis Bolano ug Russian star Dimitri Kirilov una siya nakadesisyon nga mosaka og timbang.

Sa iyang pagsaka’g timbang, nadaog niya ang IBF bantamweight pinaagi sa 7th round TKO nga kadaugan batok kang Genaro Garcia niadtong 2007.

Usa lang si Perez sa tulo ka mga langyaw nga mopakita’g aksyon sa promosyon nga gitambayayungan pagpahigayon sa ALA Promotions ug ABS-CBN.

Ang ubang mga langyaw mao sila si Mexican Bladimir “Thie Blade” Hernandez, kinsa makigharong kang Mark Melligen, ug si Thai Sapapetch Sor Sakaorat, kinsa makigharong kang Jason Pagara sa ALA gym.