NIADTONG nag-angat pa ang eleksyon sa Mayo, dunay usa ka kalihukan sa mga biker nga election-related. Gitawag to og Bike for Peace. Buntag kadto, Sabado. Nagsabot mi sa akong mga amigo nga mountain biker nga mangapil.

Pag-abot namo sa IT Park sa akong amigo nga biker nga taga Nasipit, Talamban, lainlain nga bike ang naa. Ang akong amigo nga si Titoy nagdala sa iyang Dahon brand folding bike nga gipalit sa iyang asawa sa Singapore. Nangutana ko niya kon pila. Tag P28,000 ang balor sa biseklitang gamay nga 16” ang size sa ligid.

Ordinaryo siyang tan-awon niadtong wa masuhito sa folding bike. Apan sa mga suheto, di ikahibung ang presyo kay ang brand nga Dahon maoy numero unong manufacturer sa folding bikes base sa worldwide sale. Sa Rox sa Ayala, naa didto ang tag P62,000 nga folding bikes nga Dahon. Kon di ka maka afford, naay daghang surplus.

Naengganyo

Human sa kalihukan, nagkasabot dayon mi nga manuroy og surplus shops sa Mandaue city nga namaligya og barato nga folding bikes, apil na ang mountain bike. Mao sab tong adlawa nga giganahan kog sugod sa folding bike.

Ang nakanindot man gud sa folding bike mao ang iyang maneuverability ug kasayon sa pagdala tungod kay mapilo man gud. Mahimong mapilo og kaduha or katulo, depende sa desinyo sa frame. Busa kon maabtan kag uwan sa dan samtang mag-bike, mopasilong ka, pil-on ang biselita, mopara kag taksi aron molahos pag-uli sa balay. Mao ni ang akong gibuhat makadaghan na nga higayon.

Nagpalit

Human sa among pagsuroy sa surplus shops, giganahan ko og folding bike. Sa presyo nga nag-range og P1,800-P3,000, depende sa iyang brand name. Maayo na kaayo ang mao nga kantidad. Nakapalit ko og Chevrolet nga folding bike nga ang tire size 16”. Unya giduga-ngan nako og Captain Stag. Mao ni ang gigamit sa akong duha ka mga anak sa mga ride nga dinhi lang sa siyudad.

Human sa pipila ka mga upgrade, ready na kaayo ang mga folding bikes bisan sikaran pa alang sa long rides kay pulido na kaayo ang parts kay akong gipailisan ni Ronald sa Aison. Ako na ganing gidala makadaghan sa office ang duha ka bikes aron suwayan kon unsa ka lig-on.

Alternatibo

Naghisgot kog folding bike kay akong nakit-an nga nagkadaghan ni nga matang sa biseklita. Maayo ni siya nga alternative nga sakyanan sud lang sa siyudad inay nga mag-awto o magmotor sa duol lang nga mga rota. Makapaminos pa ni sa greenhouse emissions ug maka-exercise ka pa. Ang biking man gud ang usa sa labing maayong matang sa exercise. Makadaginot ka pa kon health ang hisgutan.

Kon duna kay gamay nga ikagahin, duaw sa surplus shops aron magpalit og folding bike. Lahi ni sa BMX kay maka-save kag space sud sa balay. Mahimo rang ipasok sa suok or kon mobiyahe ka, imong palitan og dakong bag aron maoy sudlan. Pipila nako ka mga higala ingon ani ang ilang gibuhat.