DALI kaayo nga nakapanghambog ang kapulisan nga nasulbad dayon ang pagpanulis sa Banco Maximo diha sa Syudad sa Mandaue sa miaging Huwebes sulod lang sa 24 oras.

Tinuod ilang nasikop ang usa ka suspek nga nailhan sa pipila ka mga testigo. Dalaygon kining dali nga aksyon sa kapulisan.

Apan nasulbad na ba ang kaso kon usa lang sa upat ka mga tulisan ang nasikop?

Laing pangutana mao: kon masikop na ang upat apan wala pa makombikto, makaingon ba gyud kita nga nasulbad na ang maong krimen?

Alang kanako man gud, apil sa trabaho sa kapulisan mao ang pagkuha og igong mga ebidensya nga makakumbikto sa mga mga nasikop nga suspek. Di man igo ang pagpriso sa mga suspek dayon buhian ra diay kay kulang ang ebidensya o mapamatud-an nga wa diay sala.

Di unta magdali-dali nga magpasi-atab dayon nga nasulbad ang usa ka krimen kon usa lang ka suspek ang nasikop.

RUSSIAN

Hinuon, di sab ko uyon sa pipila ka pagsaway sa kapulisan resulta sa maong pagpanulis. Kuno, nahitabo ang maong tulis kay ang tanang mga pulis sa Syudad sa Mandaue tua magpunsisok sa Cebu International Convention Center (CICC) kay nagbantay sa mga Ruso nga nanambong sa Philippine Russian Business Forum and Exhibits (PRBFEx).

Didto man gyud ko sa CICC sa miaging Huwebes ug ang mga pulis nga tua didto kadtong mga batan-on. Murag bag-ong mga nang-gradweyt. Wa didto ang mga beterano nga mga pulis. Basin tua nagbantay sa ubang mga malinawong dapit sa Syudad sa Mandaue.

Ang punto nga di nato mabasol ang maong forum nga gitumong sa pagpalig-on sa turismo ug negusyo tali sa Pilipinas ug sa Russian Federation.

ILIMNON

Naa lang sab koy nabantayan sa miaging Biyernes, kapin sa usa ka adlaw sa di pa ang liquor ban tungod sa piliay sa barangay karong Lunes.

Sa kakusog manginom sa mga Pinoy, duha ka bag-ong maisog nga ilimnon ang gidalit dinhi sa atua.

Una, dunay gipahigayon nga libreng pagtilaw sa Russian Prestige vodka didto sa CICC nga tipik sa kalihokan sa Philippine Russian forum. Mao kuno kini ang labing maayo nga vodka didto sa Moscow sa 2009.

Giimbitar sab ko sa akong higalang si Chassy Cortes sa Y101 didto sa 80s Resto Bar sa dalan Rahman sa Biyernes sa gabii kay gipahigayon sab ang paglusad sa Tanduay extra strong nga 100 proof.

Sigi na lang kay di ra ba gyud ko hilig og ingon niini nga ilimnon kay naanad ko sa beer. Bahala nag makadako sa tiyan.

Apan kining duha ka mga kalamboan nakapahinuktok kanako nga sa hilig manginom sa Pinoy, ambot kon makapugong ba ang kapulisan sa pipila nga di gyud makapugong kaugalingon. Nakahinumdom man sab gyud ko sa mga miaging piliay nga bisan pa man sa giingong liquor ban, sayon gihapon makapalit og ilimnong makahubog.

Alang kanako, dakong hagit sa kapulisan ang pagpakanaog sa liquor ban ug tan-awon nato kon makapasar ba sila sa pag-atubang sa maong hagit.