NAPUPOS na kagahapon ang campaign period sa barangay ug Sangguniang Kabataan elections.

Apan di gyud kapugngan kon duna pay magsige og suroy sa kabalayan aron motimbaya lang kunohay sa mga silingan. Mopakapin dayon og hunghong nga botaran siya ug ang iyang line-up.

Naa na sab ang mga kinamay karon ug ugma, sa adlaw gyud sa eleksyon.

Kon dunay pinalitay sa mas taas nga mga posisyon, naa sab ni sa barangay ug SK elections base sa nangaging mga piniliay.

Naay uban nga mamalit og botos aron modaog sa eleksyon kay alang nila, dungog na kini sa iyang pagkatawo ug pamilya.

Ang uban sab mamalit og botos ug mogasto sa kampanya aron makakupot sa puwesto aron makadawat sa dakong honorarium ug posible, makakurakot pinaagi sa mga proyekto.

Naay uban mang-loan aron igasto sa eleksyon unya mamawi kon naa na sa puwesto.

Bisan tuod kon barangay lang kini, apan gikinahanglang pilion gyud og tarong ang mga opisyal nga ibutang sa barangay hall.

Mahinungdanon kaayo kini tungod kay ang barangay hall maoy labing batakan ug labing unang sanga sa kagamhanan.

Sila ang frontline kon serbisyo publiko ang hisgutan. Kon pakyas ang barangay officials sa ilang pagserbisyo, kapakyasan sab kini sa kagamhanan sa kinatibuk-an.

Busa tarunga pagpili ang ibutang sa pwesto. Kanang kahibawo motimon sa barangay ug 100 percent nga moserbisyo ug ligdong.

Di lang kay ang basehan mao ang popularidad ug kahinagad sa kandidato. Kinahanglan andam siyang moserbisyo ug dunay kahibawo ug katakos.