DI na makahatag og meal allowance ang Commission on Elections (Comelec) sa mga pulis nga mo-serve sa piniliay ugma.

Si Atty. Lionel Marco Castellano, Cebu Provincial Election Supervisor, nipasabot nga tungod sa kagamay sa pundo nga gigahin sa Comelec alang sa pagpahigayon sa barangay ug Sangguniang Kabataan (SK) elections maglisod na sila paghatag og meal allowance ngadto sa mga pulis nga mo-serve sa eleksyon.

Matod niya nga moabot lang sa P3 bilyones ang pundo nga gigahin, mas ubos itandi sa niaging May 10 automated elections sanglit mano-mano lang ang pagbotar ugma.

Iyang gidugang nga ang Comelec nihangyo sa mga local government unit (LGU) nga moabag kanila aron mahatagan og dugang allowance ang mga pulis ingon man mga magtutudlo nga mo-serve isip mga Board of Election Inspectors (BEIs).

Hinuon, mohatag ang Comelec og pundo alang sa pagpagasolina sa mga sakyanan nga gamiton sa kapolisan nga gipang-deploy sa kalungsuran aron pagpatunhay sa kahapsay ug kalinaw panahon sa eleksyon.

Nahibaw-an nga moabot lang sa P100 ang allowance nga gihatag sa Cebu Provincial Police Office (CPPO) ngadto sa mga sakop niini nga gipakatap sa kalungsuran sa lalawigan sa Sugbo alang sa gikatakdang piniliay karong Oktubre 25.

Kagahapon, gipahigayon ang send-off ceremony pinangulohan ni Police Sr. Supt. Erson Digal, provincial director sa CPPO. (Sheila C. Gravinez)