GIILANG big time drug pusher sa Barangay. Ermita, dakbayan sa Sugbo ug kauban, nadakpan sa mga sakop sa Provincial Intelligence Branch (PIB) atol sa usa ka buy-bust operation niadtong Biyernes sa udto sa may South Road Properties (SRP).
Sila si Robert Genovisa ug Avelino Bejasa giingong maoy tig-supply sa ubang mga drug pusher sa lalawigan sa Sugbo.
Sila si Genovisa ug Bejasa nakuhaag usa ka dakong putos nga shabu, nga gibana-bana sa kapulisan nga 25 ka gramos nga dunay street value nga P150,000.
Si Supt. Rodulfo Albotra, hepe sa PIB nga nahinabi sa mga tigbalita, nagkanayon nga niadtong Biyernes nag text si Genovisa sa iyang kontak nga si Jeffrey Blanco, taga Bago, Asturias kinsa nadakpan sa PIB ug Tuburan police sa buy-bust ug niadtong Miyerkules sa gabii didto sa Brgy. Colonia, Tuburan.
Si Blanco nadakpan uban sa kauban niining pusher nga si Joel Gadiana, taga Sitio Jai Alai, Brgy. Mambaling, dakbayan sa Sugbo.
Nakuhaan siyag usa ka dakong plastic pack nga shabu ingon man medium plastic pack nga subject sa pinalitay, duha ka medium plastic pack ug 11 ka pakite.
Si Albotra niingon nga ila na untang ipasaka ang kaso batok kang Blanco ug Gadiana, apan dihang nag text si Genovisa kon kanus-a mopalit og shabu ang nauna, ilang gipalapdan ang ilang follow-up operation aron masikop ang ubang mga kontak niini.
Tungod niini gisakyan sa iyang mga personnel ang text ni Genovisa, kinsa wa masayod nga mga sakop sa PIB ang gika-transact niini sa shabu.
Unang transaction sa pinalitay diha sa lungsod sa Minglanilla.Nausab ang transaction diha na sa SRP mag-abot hinungdan nga daling gipakatap ang tropa sa PIB dala ang boodle money.
Niabot sila si Genovisa nga maoy nagdala sa motorsiklo nga angkas si Bejasa. Gimanduan niini nga ihatag ang shabu ug dihang gidunol ang kwarta sa nagpailang poseur buyer nga pulis, gidakop dayon silang duha. (GPL)