ANG kapulisan sa siyudad sa Tagum nagplastar karon sa hugot nga seguridad aron di matugaw ang kalinaw ug kausay sa Sanguniang Kabataan ug barangay election karon adlawa.
Sumala pa ni Gusseppe Geralde, hepe sa Tagum City Police Station, nga kagahapon pa lamang gisugdan na sa pagpatuman sa kapulisan ang doble alerto sa tibook siyudad aron sa pagseguro nga way mga dautang elemento nga makahimo og samok.
"Ang atong yunit naka-prepare na tanan, doble alerto na kita karon aron magmalinawon ang election ug way mga kasamok nga mahitabo", sulti ni Geralde sa paghinabi sa Superbalita.
Matud ni Geralde nga kaabag nila sa pagbantay mao ang tropa sa kasundaluhan nga gipang-deploy sa matag barangay.
Duna sab tropa gikan sa region ug provincial office sa kapulisan nga gidungag sa kapulisan sa Tagum aron bantayan ang eleksyon karon.
Gisulti sab ni Geralde nga duha ka mga barangay ang ilang gitutukan karon tungod kay init ang politika didto.
Ang maong mga barangay mao ang Apokon ug Bingcungan nga init ang politika tungod sa magka-atbang nga kandidato.
Hinoon gisulti ni Geralde nga bisan sa maong hulga masaligon silang magmalinawon ang dakbayan.
Wa sab nakitang hulga labot insurhensiya ang kapulisan sa siyudad sa Tagum.
Samtang sa pikas bahin, andam na sab ang buhatan sa Comelec alang sa eleksiyon karong adlawa.
Matud pa ni Gladiel Jim Casinto, election officer sa Comelec sa Tagum City, nga andam na sab sila ug ila nang nasulbad ang mga kakulian sa mga pagpangamdan sa piliay.
Sumala ni Casinto nga naglaum sila nga daghan ang mobotar karon.
Nanawagan sab ang Comelec ngadto sa mga kandidato nga ipatigbabaw ang kalinaw ug kalimtan ang mga isyu nga mga gipabuhagay sa milabaw nga pagpangampanya.
Panawagan sab ni Casinto sa mga botante nga kung wala sila nakabutar sa duha ka sagunson nga election dili na ipamugos ang ilang kaugalingon nga makabuto sanglit nawala ang ilahang ngalan sa listahan sa Comelec. (Marvin Pineda)