ANG Philippine Army (PA) ug Philipine National Police (PNP) magtinabangay karon sa pagbantay sa pagahimuong piniliay sa Davao Region.
Ang militar ug kapulisan gitakdang ipatuman ang ilang gimbuhaton sigun sa nasabotan sa 10th Infantry Division ug Police Regional Office (PRO)-Davao Region.
Si 10th ID spokesperson Lt. Col. Medel Aguilar nagbutyag nga ilang paningkamotan nga mahimong malinawon ang eleksiyon karong adlawa pinaagi sa pagpakatag sa kasundalohan sud sa ilang area of responsibility.
Dinhi sa siyudad sa Davao, suma ni Aguilar, dunay tulo ka batallion lakip na ang Task Force Davao (TFD) ang ipakatag aron masiguro ang seguridad sa katawhan nga moboto karon sa barangay eleksyon.
Si Aguilar nagbutyag nga dunay 13 ka battalion ilawom sa 10th ID ang ilang ipakatag sa Davao Region ug probinsiya sa South Cotabato, Saranggani Province, ug parte sa Sultan Kudarat.
"That is enough already to cover the whole area of responsibility," ni Aguilar sa gihimong press conference didto sa TF Davao.
Sa bahin sa kapulisan, gitahasan sab ang Davao City Police Office (DCPO) nga bantayan ang mga presinto dinhi sa siyudad sa Davao.
"Pag pumunta kayo sa polling place in Davao City, makikita niyo na may minimum of 2 policemen and 2 soldiers, and a squad of TFD troops within the vicinity of the polling centers," paniguro ni Jose Jorge Corpuz, deputy regional director for administration sa Police Regional Office (PRO) 11.
Ang maong opisyal nagkanayon nga ila kining gihimo aron malikayan ang kasamok sa pagahimuong piniliay sa barangay.
Si Corpuz nagkanayon nga ila sab bantayan tibuok rehiyon diin dunay mga lugar nga gikonsidera nga init kaayo ang politika.
Sa Davao Del Norte, suma ni Corpuz, dunay 273 ka polling areas, diin ang 1002nd Infantry Brigade ug kapulisan sa probinsiya maoy gitahasan sa pagbantay sa seguridad sa katawhan.
Kapulisan maoy mohupot sa 160 polling areas samtang ang 1002nd IB maoy mosiguro pagbantay sa 113 ka polling centers, sigun sa ilang nasabotan niadtong miaging semana.
Ang Davao Del Sur, dunay 373 ka polling areas nga maoy bantayan sa mga sakop 39th Infantry Battalion ug Davao del Sur Police Provincial Office (DDSPPO).
Sa Compostela Valley, dunay 285 ka polling centers, 97 niini bantayan sa kapulisan samtang 188 sab sa AFP.
Sa Davao Oriental, may 240 ka polling areas, 175 niini atimanon sa PNP samtang ang 68 sa AFP.
"I have all the names of personnel deployed in different polling areas. Paglabas pa lang ng mga voters from their houses, andyan na ang ating mga AFP at PNP nakabantay," pahayag ni Corpuz.
Ang maong opisyal nagsulti nga alas 3:00 sa kaadlawon anaa na ang pulis ug militar nga mobantay sa seguridad sa katawhan. (AD)