DEAD on the spot ang drayber sa Kia Sportage human gibanggaan sa Isuzu Drilling Car sa alas 9:45 sa gabii niadtong Sabado.
Sa maong insidente naangin pa ang laing duha ka mga sakyanan ug duha ka mga tawo nga naglakaw daplin sa kalsada didto sa Kilometer 5.5, Diersion Road, Barangay Matina Pangi, siyudad sa Davao.
Namatay mao si Antonio Cualing, hamtong ang pangidaron ug nagpuyo sa Jacinto Street, ning siyudad, sigun sa spot report sa Talomo Police Station.
Si Cualing gideklara nga dead on the spot sa mga paramedics sa Central 911 sud sa iyang gimaneho nga Kia Sportage nga dunay plate number MCP-987 tungod sa kakusog sa pagkabangga sa Isuzu Drilling Car nga dunay plate number PLM-612.
Ang maong sakyanan gimaneho ni Crestino Bosquit, nagpuyo sa Fatima, General Santos City.
Nasayran nga gikan sa norte nga bahin ang sakyanan ni Bosquit paingon sa Ulas apan iyang nabanggaan ang sakyanan ni Cualing didto sa Kilometro 5.5, Diversion Road.
Human nabangga sa sakyanan ni Cualing ang maong sakayanan, nabangga sab ngadto sa Kia Dropside nga dunay plate number XLM-830 ug gimaneho ni Cyrus Medel, nagpuyo sa Barangay 8-A Poblacion, ning siyudad.
Gawas sa sakyanan ni Medel, nabanggaan sab ang Ford Ranger nga dunay plate number XJX-830, gimaneho ni Rudento Nabong Jr. nga taga Dayawan Villa, Misamis Oriental.
Mga pasahero sa maong sakyanan nga sila Emilio Mangaron Jr. ug Erlinda Mangaron, pulos nagpuyo sa Marilao Bulacan, nasamdan sa maong insidente mao nga gidala sila sa Davao Doctors Hospital.
Samtang nagsampok ang upat ka mga sakyanan, naangol sab ang mga tawo nga naglakaw daplin sa kalasada nga mao sila Meshty Bragat, 18, ug Sheryl Escoto, 14, pulos taga Matina Pangi.
Mga biktima pulos gipangdala didto sa Southern Philippines Medical Center (SPMC) samtang si Bosquit gidala didto sa Talomo Police Station alang sa dugang imbestigasyon. (AD)