PATAY ang usa ka habal-habal driver human gipusil niadtong Sabado mga alas 9:30 sa gabii sa Aluba, Macasandig ning siyudad sa Cagayan de Oro.

Giila ang biktima nga mao si Albert Calsa, 27, adunay kapuyo ug taga Barangay Bayabas, ning siyudad.

Si Police Officer 3 Ronilo Naquila sa Police Station 9 (PS9) sa Macasandig nga nahinabi sa Sun.Star Superbalita nibutyag nga kanunay na nga mamasahero ang biktima matag gabii.

Nasayran nga sa Agora nga bahin ning siyudad kasagaran mag-alley ang biktima ug gituohang nagpahatod niini ang suspetsado sa hilit nga dapit sa Aluba.

Apan paghidangat sa lugar kalit lang nga gipusil sa pasahero ang driver ug gikuha ang motorsiklo.

Sa inisyal nga imbestigasayon sa kapolisan, pagpangarnap ang motibo sa pagpangluthang tungod kay posibleng ang motorsiklo sa biktima ang gisakyan sa suspek.

Gani ang mga residente sa dapit nga maoy nangayo og tabang sa kapolisan dihang nadungog ang kusog nga buto maoy nidala sa biktima sa JR borja Memorial Hospital apan giduso sa Northern Mindanao Medical Center (NMMC).

Kagahapon mga alas 2:45 sa kadlawon nakabsan sa iyang kinabuhi sulod sa emergency room sa NMMC si Calsa tungod sa igo sa ulo nga naangkon.

Dihang miresponde sa dapit ang kapolisan nahipos sa crime scene ang usa ka basyo sa bala sa kalibre .45 nga posibleng maoy gigamit sa suspek.

Ang PS9 padayon pa sa pagsunod sa motibo sa pagpatay ingon man pagpangita sa motorsiklo.

Samtang ang patayng lawas sa biktima anaa na gidala karon sa Bollozos funeral parlor. (Stephanie V. Berganio)