DEAD on arrival ang usa ka driver human gipusil-patay mga alas 8:45 sa gabii diha sa Barangay Dayawan, lungsod sa Villanueva, Misamis Oriental.
Giila ang biktima nga mao si Conrado Dayuhan, hingkod ang edad, residente sa susamang dapit ug usa ka habal-habal driver.
Sa inisyal nga imbestigasyon sa Villanueva Police Station ubos ni Police Senior Inspector Surki Sereñas, nasutang namasahero ang biktima sa maong dapit apan paghidangat sa hilit nga bahin, kalit lang kining giatangan sa wala mailang mga suspetsado ug deretsong gipusil gamit ang wala pa matinong armas.
Naigo sa iyang dughan ang biktima apan dihang naligid kini ug nahulog gikan sa iyang motorsiklo, wala pa nakuntento ang suspetsado ug gibundakan pa og bato ang ulo sa biktima nga maoy posibleng hinungdan sa hinanaling kamatayon niini.
Daling misibat ang suspek, kinsa padayon pa nga gipangita sa kapolisan ning panahona.
Nagbuy-od ug naligo na sa iyang kaugalingon nga dugo ang driver dihang narespondehan sa kapolisan apan ug bisan namatikdan nga wala paglihok niini, gisuwayan gihapon kini og dala sa Northern Mindanao Medical Center (NMMC) ning siyudad sa Cagayan de Oro apan dead on arrival kining gideklarar sa mga doctor.
Nagtuo ang kapolisan nga pagdumot ang motibo sa krimen, hinuon padayon pang gisuta. Patikan usab ang biktima ug giimbestigahan sa kapolisan kung unsay mga kalambigitan niining krimen.