FULL alert status ang mga sakop sa Cagayan de Oro City Police Office (Cocpo) sa ipahigayon nga barangay ug Sangguniang Kabataan (SK) election karong adlawa.

Gibutyag ni Acting City Police Director Benedicto Lopez nga matag area of responsibility sa mga police station nakaalerto na sa mga polling precincts lakip na niini ang pag-escort sa mga balota, pagbantay sa palibot, pagpatuman sa liquor ban ug gun ban, pagsikop sa mga kandidatong namaligya ug namalit sa boto ug uban pang mga insidente nga naglambigit sa eleksyon.

Samtang ang Armed Forces of the Philippines (AFP) ang magpatuman sa gitawag nga task force H.O.P.E. (Honest, Orderly, ug Peaceful Elections) diin mao ang pag-reactivate ug pag-monitor ug pagdawat sa reports kalabot insidente sa eleksiyon.

Ning siyudad, lakip sa alerto ug nikooperar ang pipila ka mga sakop gikan sa Philippine National Police Region 10 sa Camp-Alagar, Lapasan ning siyudad ug ang 4th Infantry Division sa Camp-Evangelista nga maoy magpatuman sa task force Hope.

Pipila usab sa mga polis gilaumang makita sa kadalanan ug pagpahigayon og pag-checkpoint sa entry ug exit nga bahin ning siyudad. Samtang ang Roads and Traffic Administration (RTA) gimandoan nga maoy magsiguro sa kahapsay sa dagan sa trapiko.

Malaumon ang kapolisan nga unta matapos ang eleksyon nga malinawon labina ning siyudad ingon man sa tibuok nasod.

Samtang sa laing bahin human gisugdan sa alas 12:00 kagahapon sa kadlawon ang liquor ban, daghan sa mga tawo ang misupak niini apan pipila ang gihatagan og higayon sa kapolisan labina nga giingong wala masayod sa maong balaod ang pipila niini. (Stephanie V. Berganio)