LAING dakong oportunidad ang naghuwat alang kang Ritchie Mepranum kay adunay laraw nga paawayon siya sa undercard sa Pacquiao-Margarito fight karong Nobiyembre 13 sa Dallas Cowboys Stadium.

Alang kang Mepranum, usa kini ka dakong kahigayunan aron bangunon pagbalik ang iyang nagkaunlod nga boxing career.

Niadtong Hunyo ning tuiga, napakyas si Mepranum sa premiro niyang pagpanuktok alang sa world title. Nalupig siya ni Mexican Julio Cesar Miranda pinaagi sa 5th round TKO.

Wala sab hinuoy saktong kondisyon si Mepranum niadtong higayuna kay iyang gidawat ang away bisan aduna lang siya’y tulo ka semana nga preparasyon kay ulahi na niyang nadawat ang imbitasyon.

Kuwang kaayo ang sparring sessions nga kinahanglan gyud kaayo unta alang sa usa ka world title bout.

Nakita sa maong away nga hinay gyud kaayo ang lihok ni Mepranum, gani human pa lang sa first round naghangak na siya tatawng kuwang gyud kaayo siya sa ensayo.

Dili man tuod siya usa ka lehitimong knockout puncher nga sama sa iyang katagilungsod nga si Pacquiao apan aduna gyud siya’y maayong abilidad ibabaw sa ring.

Niadtong 2008, nasurpresa ang kadaghanan dihang gilupig ni Mepranum ang mas inilog niyang kontra sa labing una niyang away sa Amerika isip usa sa undercard sa Pacquiao-De La Hoya bout.

Kon madayon, ikaharong ni Mepranum si American Anthony Villareal, kinsa nalupig na ni Milan Melindo sa ALA gym.

Adunay maayong abilidad si Villa­real bisan pa man tuod og napilde siya ni Melindo hinungdan nga usa kini ka dakong pagsuway alang kang Mepranum.