KUMBINSIDO na si American trainer Freddie Roach nga sa dili madugay, moretiro na gyud ang iyang labing paboritong boksidor nga si pound-for-pound champion Manny Pacquiao.

Sa interbyu sa BBC World Service, nagkanayon si Roach nga aduna na siya’y nakitang senyales kabahin niini human siya seryusong nakig-estorya sa Pambansang Kamao sa Pilipinas.

Nalantawan ni Roach nga ang labing lig-on nga hinungdan nga mobiya si Pacquiao sa boksing mao ang pulitika.

“After the first couple of days of training, Manny came up to me and said: ‘I miss my job.’ And I said: ‘You’re at your job,’ and he said ‘No, I miss Congress,” matod ni

Roach.

Seryuso gyud kayo hinuon si Pacquiao sa iyang obligasyon isip kongresista sa Sarangani Province nga bisan nag-training siya sa Baguio City, aduna gyu’y higayon nga modalikyat kini pagdulhog sa Manila aron tumanon ang iyang obligasyon sa kongreso.

“We are going to lose Manny Pacquiao to politics, for sure,” dugang ni Roach.

Giangkon ni Roach nga iyang nabantayan nga kuwang ang determinasyon ni Pacquiao sa ensayo dili sama sa nangagi niining mga away.

“He’s getting better and better every day, but it’s coming a lot slower than usual.

Usually, Manny has his first sparring session and could fight 12 rounds the next day.

I can’t say that at this point in the camp.”

Mikompisal sab si Roach sa British broadcasting company nga ning higayuna, wala gyud siya nalipay sa nahitabo sa ilang training camp ug ulahi na gyud sila’g gamay sa eskedyul.

“We’re fighting against a big, strong guy who’s going to be in great shape and we’re a little behind schedule which is very unusual,” pag-angkon ni Roach.

“I’m not sure if it’s the size of the sparring partners that’s giving him trouble or he’s just not himself yet.”

Hinuon nagkanayon si Roach nga iyang paninguhaon nga motutok na gyud og maayo si Pacquiao sa ensayo karon nga mitapon na sa Wild Card gym sa Los Angeles ang ilang training camp.

Kagahapon niabot na sa Los Angeles ang kinatibuk-ang sakop sa Team Pacquiao.

Sama sa naandan, gikagubtan na sab ang 7-time world champion sa iya pa lang pagtaak sa airport.