Tambagi ko Noy Kulas: Gusto magminyo

DEAR Noy Kulas,

Maayong buntag diha, Noy. Ako diay si Sheila, 25 years old. Naa koy uyab. Dugay na kaayo ang among relasyon ug mahal kaayo namo ang usag usa. Ang among problema kay gusto na unta mi magminyo. Ang nakaapan lang kay kasado man ni siya sa una. Mao man god ni, Noy, nagkabuwag man god ni sila sulod na sa daghang katuigan. Wa gani ni maghatagan og sustinto ning tawhana sa bata sukad nag 2-anyos ang bata sukad sa ilang panagbulag kay mahadlok man god ni siya nga isalikway sa iyang inahan kon mohatag siya.

Sa una na, Noy, sa di pa mi uyab ani nakigkita ni siya sa iyang ex ug iyang gihangyo nga magbalik na lang sila alang alang sa bata apan gisalikway niya kay mahadlok man siya nga isalikway siya sa iyang pamilya.

Niabot ang pipila ka mga tuig nabuang ning tawhana ug magsigi pa man gani ni kunog inom og tambal kay mosugmat man ang sakit. Hangtod karon mabalitaan man namong duha kay silingan man ni sila sa iyang ex. Mao ni ang akong mga pangutana:

1. Kon makagukod pa ba siya gihapon kon kami magminyo nga daghan na mang katuigan ang nakalabay sa ilang panagbuwag?

2.Unya kaning tawhana naaksyon man ning kabuang o ibutang ta lang may mental disorder?

3.Igo na ba nang basihan para maminyo ang ako uyab?

4.Ang kakowang ba niyang kapabilidad isip bana sa usa ka relasyon,pwede ba namong gamitong sagang kon usa man galing mahitabo?

SHEILA

Sheila,

Maayong adlaw diha nimo. Medyo naglibog kog gamay sa imong estorya. Kay kon basehan nako ang imong estorya, maorag di man maayong makigminyo ka niya kay baya, mahadlok siya sa iyang inahan. Mahadlok siyang modesisyon alang sa iyang kaugalingon? Hinaot pa untang nasayop kog interpret sa unang bahin sa imong suwat.

Tubagon ko na lang ning imong mga pangutana. Una, di gyud mo magkaminyo kay duna pay bisa ang ilang kasal. Wa pa man ni ma-annuled o madeklarar nga null. Ikaduha, nabuang man nang tawhana, di gihapon na pasikaranan. Sa gihapon korte ang mohukom pinaagi sa pagpasaka sa kasong annulment base sa mental incapacity. Mao ni ang tubag sa ikaduha ug ikatulong pangutana.

Ikaupat, di gihapon na mahimong basehan. Mas maayo pa, annulment na lang nga kaso ang isang-at sa korte kay wa laing paagi nga masulbad ang inyong problema. Kay mao ra nay bugtong paagi nga mabugto ang talikala sa kaminyuon nilang duha. Kon wa pa ni, di gyud mo makasal.

Karong ra ba sang panahuna, pwerteng mahala na sa gasto sa annulment. Mao nang uban nagpuyo-puyo na lang intawon.

NOY KULAS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph