WA nay makapakgang pa sa pagpahigayon sa eleksyon sa barangay ug Sangguniang Kabataan (SK) karong adlawa.

Apan posibleng malangay ang pagsugod sa pipila ka mga presinto sa tunga-tungang Kabisay-an.

Kini tungod sa kalangay pag-abot sa mga election supplies nga gikan sa kaulohan.

Kini mismo ang giangkon ni Atty. Veronico Petalcorin, regional director sa Commission on Election (Comelec) Central Visayas dihang nahinabi sa Bombo Radyo Cebu kagahapon sa buntag.

Si Petalcorin niingon nga daghan pang mga lugar sa rehiyon siyete ang wa pa makakumpleto og dawat sa mga election supply, lakip na niini ang lalawigan sa Sugbo.

Matod niya nga daghan pa kaayong mga election supply ang wa pa makadawat sa mga municipal treasurer sa Sugbo nga gikatakda untang mangabot niadtong Sabado.

Nunot niini, wa gipadaplin sa opisyal ang posibilidad nga malangay ang pagsugod sa pinili-ay sa pipila ka mga polling precinct sa pipila ka mga dapit sa tunga-tungang Kabisay-an.

Si Petalcorin nipasalig hinuon nga madayon gyud ang eleksyon karong adlawa apan di lang makasugod dayon sa gitakdang oras.

Basi sa guidelines sa Comelec, magsugod ang botasyon alas 7 sa buntag ug matapos alas 3 sa hapon apan mahimo gihapon makabotar ang mga tawo nga naglinya pa gawas sa polling places apan nalista na sa mga Board of Election Inspectors.

“Ready na ta. Magpadayon atong piniliay apan dunay mga area nga malangay ang pagsugod sa botasyon. This is beyond our control,”matod pa ni Petalcorin dihang nahinabi sa Bombo Radyo Cebu.

Sa pagkutlo ning balita alas 3 sa hapon kagahapon, wa pa mangabot ang official ballots, election returns, bond paper, envelopes, self locking metal seal ug ubang election paraphernalia sa Kapitolyo diin nagpaabot ang mga municipal treasurer.

Samtang si Petalcorin nipadayag og kaluoy sa mga magtutudlo ug municipal treasurers tungod kay nagbilar sila pagpinaabot sa mga election supply aron maseguro nga dunay magamit sa piniliay. (Sheila C. Gravinez)