KONTROBERSYAL nga baranga kapitan nga si Marianito Yaon sa Antipolo, lungsod sa Medellin, Sugbo gilabay og granada sa usa ka wanted nga lalake human sila nagkapinusilay gumikan sa lalis sa illegal nga drugas kahapon sa alas 2 sa hapon didto sa nahisgutang barangay.

Si Sr. Supt. Erson Digal, director sa kapulisan sa lalawigan sa Sugbo nga nahinabi sa dySS Super Radyo ug Sun.Star Superbalita, nagkanayon nga dunay nanawag sa Medellin Police Station labot sa usa ka shooting incident didto sa Brgy. Antipolo.

Ang nanawag nipahibawo nga si Yaon ug ang wanted nga si Jojo Arriesgado nagpinusilay.

Matod pa ni Digal nga samdan si Arriesgado sa iyang walang paa human maigo sa .45 kalibre nga armas ni Yaon samtang nagpinusilay human sa ilang lalis.

Nadakpan hinuon si Arreisgado sa mga sakop sa Provincial Intelligence Branch (PIB) mga alas 4:00 na sa hapon sa Daanbantayan District Hospital sa lungsod sa Daanbantayan.

Sumala pa ni Digal nga taudtaud nga gipangita si Arriesgado sa mga sakop sa PIB tungod sa kaso niining patay diha sa ilang lugar.

Apan mga alas 4 pasado kagahapon sa hapon nadakpan sa PIB si Arriesgado nga nagpatambal sa ospital nga naggamit sa ngalan nga “JunJun’ Pilapil nga taga Poblacion, Daanbantayan.

Siyal giingong gihatod og upat ka mga tawo nga nialigar nga gipusil og pugakhang.

Giklaro hinuon ni Digal nga ang maong krimin way kalambigitan sa isyu sa pulitika kun di drugas maoy motibo sa krimin.

Si Sr. Insp. Bonifacio Arriesgado, hepe sa Medellin Police Station, nagkanayon nga usa ka concerned citizen maoy nitawag kanila labot sa insidente.

Pagrespondi nila uban sa mga sakop sa 78th Infantry Battalion naabtan na lang nila ang motorsiklo ni Yaon nga nagkayo pa nga gisunog.

Ang balay maayong pagka-gusbat human maigo sa Granada. Kini gipanag-iya sa kanhi police nga si PO1 Jessie Cabucos, kanhi sakop sa Regional Mobile Group (RMG-7) nga na-dismissed tungod sa illegal nga drugas.

Si Sr. Insp. Arreisgado niingon nga usa ka Guillermo Cabucos, amahan ni Jessie, nibutyag nga nakamata na lang siya dihang nadungog niini ang buto-buto sa armas sa balay sa iyang anak duol sa iyang balay.

Iyang gisusi ang gigikanan sa buto ug iyang nakit-an si Jojo nga nagdala sa KG-9 nga armas nga nakigpinusilay ni Yaon.

Giingong si Yaon nagdala usab sa iyang pistola samtang gigukod ni Arriesgado agi sa luyo sa balay.

Apan wa na kini maabti ni Arreisgadp si Yaon hinungdan sa kasuko niini gipusil ang motorsiklo nga TMX sa kapitan nga gi-parking, apan wala kini masunog hinungdan nga nagkuhag posporo ug giduslitan.

Dugang ni Sr. Insp. Arreisgado nga dunay mga tawo sa dapit ang nitug-an nga gisundan si Yaon, ni Jojo paingon sa balay ni Jessie nga daw dunay gireklamo.

Apan si Yaon nitubag nga “ ayaw tuo anang mga estorya, Gaw,” dayon nisunod ang buto-buto sa pusil.

Giingong si Yaon nisulod sa balay ni Jessie human masamdi si Jojo.

Apan dihang didto na sa sulod sa lawak ang kapitan, si Jojo nikuha sa iyang gidalang granada ug gilabay sa sulod hinungdan nga maayong pagka-gusbat sa balay ug nangabuak ang bildo nga bintana.

Narekuber sa crime scene ang siyam ka mga kabhang sa bala sa .45 nga pistola, ingon man upat ka mga kabhang sa bala sa 9mm nga armas nga KG-9 ni Jojo ingon man pin sa granada.

Wa pa mahibaw-i hain tago si Yaon, kinsa giingong samdan.

Sa pagsuwat ning taho kagabii, gipangita pa siya sa kapulisan.