NAGKAPULIKI ang Malita police sa pagpakgang sa kaguliyang nga nahitabo didto sa Barangay Asbang, Malita human nagkagubot ang mga suporter sa mga politiko.

Sa uwahing taho nga nakaabot sa Davao del Sur Provincial Police Office (DDSPPO) giingong nahitabo ang kagubot banda alas 11:30 sa gabii niadtong Sabado.

Nahitabo kini sa dihang ang mga suporter ni Barangay Kapitan Mansinobao ug Barangay Kagawad Obot Lopez nag-abot sa maong lugar.

Nagpatrolya pa ang kapulisan sa Barangay Asbang sa dihang nahitabo ang kasamok ug bisan anaa pa ang ilang presensiya wa sila tuohi sa mga nalambigit sa kaguliyang.

Usa ka buto sa armas ang nilanog sa lugar hinungdan nga si Police Officer 2 Gallardo nagpabuto sab sa iyang M16 armalite rifle sa ibabaw nga bahin.

Nasuta nga usa ka Zenito Abrigana, kinsa di pa matumbok ang kandidato nga gisuportahan, ang gikulata.

Padayon pang gisubay sa kapulisan ang nahitabo aron pormal nga mapasakaan og kaso ang nagpaluyo sa kaguliyang.

Gipangita sab sa otoridad kon kinsa ang nagpabuto niadtong tungura human nga ilang gibadlong ang napasiugda sa kaguliyang. (Orlando B. Dinoy)