USA ka 82 anyos ang nabangalan sa iya mismong anak nga wa nay kinabuhi ug dunay mga samad agi og asido sa lawas niini.

Si Police Officer 1 Sheila May Pansoy, imbestigador sa hitabo, nagkanayon nga banda alas 7 sa buntag niadtong Dominggo igo na lang silang nakadawat sa taho nga nakit-ang patay ang biktima sud sa iyang tindahan.

Ang biktima nga mao si Lucas Ceneta, biyudo ug nagpuyo sa Barangay Aplaya, lungsod sa Hagonoy, Davao del Sur, nakaplagan sa iyang anak nga si Nonito, 45, minyo ug molupyo sa maong lugar nga wa nay kinabuhi.

Gibisita unta ni Nonito ang iyang amahan Dominggo sa buntag aron timbayaon sa iyang adlaw'ng natawhan apan wa magdahom patay na diay kini.

Matod ni Pansoy, nakit-an pa ang biktima sud sa iyang tindahan Sabado sa gabii sa iyang silingan nga si Arsenio Sambranos kinsa nipalit og softdrinks.

Sa paghiling sa mga otoridad, nasuta nga adunay mga samad sa gituohang kemikals ang lawas sa 82 anyos ug napaso sab ang iyang kinatawo.

Si Police Inspector Gil Arobo, hepe sa kapulisan, nagmando nga ipahiling ang biktima sa ilang medico legal ug i-duso sa Scene of the Crime Operatives (Soco) ang pag-imbestiga sa motibo sa kamatayon sa tiguwang. (Dondon Dinoy)