MOABOT sa 28 na ka mga tawo ang nasikop didto sa Rehiyon 12 sa gipatuman nga gun ban sa kabahin sa piliay sa barangay ug Sangguniang Kabataan kagahapon.
Matud pa ni Police Chief Inspector Jomar Alexis Yap, information officer sa PNP-12, nga nasikop ang mga suspek sukad nga gisugdan ang pagpapatuman sa gun ban niadtong Septyembre 25 hangtud Oktubre 24.
Matud pa niya, nga unom ang nasikop sa Sultan Kudarat, tulo sa Gensan, walo sa siyudad sa Cotabato, walo usab sa North Cotabato, duha sa South Cotabato ug laing usa sa Regional Mobile Group sa PNP.
Gidugang pa ni Yap, 24 sa 28 ang napasakaan na og kaso.
Gitahasan ni PNP-12 Regional Director Gil Meneses ang tanan nga mga hepe sa kapulisan nga palig-unon pa ang seguridad sa ilang matag lugar, ilabina na nga dakong hulga karon ang pagpamomba susama sa nahitabo sa Barangay Dalapitan, Matalam, North Cotabato.
Ang pagpatuman sa gun ban matapos hangtud sa Nobyembre 10, 2010. (Edgardo Fuerzas)