16 sakpang nagtagay, sikop
NASIKOP sa kapulisan ang 16 ka mga tawo tungod sa paglapas sa liqour ban nga gipatuman sa Commission on Elections (Comelec) niadtong Dominggo dinhi sa siyudad sa Davao.
Base sa journal sa Davao City Police Office (DCPO), ang Tugbok Police Station nakasikop og lima ka mga tawo sa alas 8:00 sa gabii didto sa Panadero, Barangay Mintal.
Nasikop mao sila Rodel Guaton, 20, taga San Roque New Bataan, Comval Province; Ruel Banga, 30, taga Lupon, Davao Oriental; Jerry Gines, 37, taga New Bataan; Joven Raganit, 22, taga Mati, Davao Oriental; ug Alex Ponce, 39, taga Mati, Davao Oriental.
Silang tanan nasiplatan sa kapulisan nag-inom og beer sa ilang gitrabaho nga Panadero mao nga gisikop sila ug gipriso sa Tugbok Police Station.
Ang Toril Police Station sa pikas bahin, nakasikop sab nila ni Felix Poquita, 57; ug Benjie Tapel, 20, ug pulos nagpuyo sa Barangay Daliao, Toril.
Ang duha nasiplatan nga nag-inom og Tanduay kilid sa usa ka bakery sa maong lugar mao nga gisikop ug gidala sa presinto.
Nasikop sab sa Sta. Ana Police Station si Dominique Del Rosario, alyas Chin-chin, 25, security guard ug nagpuyo sa San Miguel, Barangay Agdao Proper.
Si Del Rosario nasiplatan nga nag-inom sa alas 9:15 sa gabii mao nga gisikop siya sa mga pulis.
Samtang ang Buhangin Police Station nakasikop sab nila Eugene Araneta, 29, taga Lupon, Davao Oriental; Ramos Makigod, 33; ug Alber Heponia, 22, pulos nagpuyo sa Country Homes, Barangay Cabantian.
Ang tulo nasikop didto sa Box Store sa Country Homes sa alas 954 sa gabii samtang sila Ryan Guarte, 23, taga Communal, Buhangin; Ruel Abrao, 21, taga Cagayan de Oro City; Jerry Buac, 21, taga Barangay Mandug; Roderick Basañez, 24, taga Calinan ug Virgil Villarmia, 24, nagpuyo sa Purok 8, Barangay Communal nasikop sab sa alas 8:19 sa gabii didto sa Buhangin Public Market.
Sa laing bahin, nasikop sab kapulisan duha ka mga menor de edad tungod kay nakalapas sa Comelec gun ban sa alas 10:00 sa gabii niadtong Dominggo.
Nasikop gitago sa Superbalita nga si Raven, 16; ug Gen Paul, 16, pulos nasikop didto sa Emily Homes, Barangay Cabantian.
Mga nasikop gitakdang pasakaan og kasong paglapas sa liqour ban Comelec gun ban ngadto sa korte. (AD)