ALANG nako dili na kinahanglan kining balaodnon ni Senador Lito Lapid nga "Maintenance of Parents Act of 2010" nga maghatag og katungod sa ginikanan paghangyo sa korte nga suportahan sila sa ilang mga anak.

Usa sa gibasihan ni Lapid mao ang nagkadaghang tigulang nga mga ginikanan nagkalisod tungod kay gipasagdan nalang sa ilang kabataan.

Uyon ko sa panghunahuna ni Lapid nga ang maong balaodnon magpahinumdom sa mga anak sa ilang responsibilidad pag-atiman sa ilang ginikanan labi na niadtong mga tigulang na.

Kon mopasar kining balaodnon ang gobiyerno na unya maoy mohatag og abogado sa ginikanan aron mapugos ang ilang mga anak sa paghatag og suporta. Maghatag lang nuon kini og gintang sa relasyon sa anak ug ginikanan.

Nasayod ko wa magkuwang ang gobiyerno sa programa alang sa mga elderly o senior citizens o kining mga tigulang.

Sa atong Department of Social Welfare and Development duna silay "Residential Care Services" diin naghatag og 24- oras nga serbisyo ngadto sa mga pobre nga pamilya.

Ang maong programa pwede kana palapdan pinaagi sa paghimo og mga pasilidad alang niadtong mga ginikanan nga wala na gyuy mahimo sa kinabuhi kay lagi gipasagdan na sa ilang pamilya. Pagkakaron, pipila lang kga mga pribadong grupo ang dunay balay alang sa mga senior citizens.

Sa Estados Unidos ug sa ubang nasod, dili gyud mapasagdan ang mga elderly kay giatiamn kini sa gobiyerno. Gipapuyo ug gipakaon ug gihatagan og mga gimbuhaton nga ilang makalingawan ug makuwartahan.

Nganong dili man kini maoy ipamugos ni Senador Lapid. Mas maayo pa mopasar siya og balaodnon nga magmando sa tanang local government unit, munisipyo man o probinsya, sa pagtukod og "home of the aged."

Magpasar siya og balaod nga magmando sa PSCO nga maggahin og pila ka porsento sa income niini alang nianang proyektoha. Unya kining mga LGU maoy momintenar sa pasilidad ug pagpakaon sa mga elderly.

Ang nakadaot lagi sa atong nasod, walay bag-ong proyekto, kanunay lang pagpaaspalto sa karsada nga daan nang giaspalto, pagpatukod og bag-ong opisina ug pagpalit og bag-ong sakyanan.