WALO ka mga lalaki ang nangasikop sa mga sakop sa Cagayan de Oro City Police Office (Cocpo) human gisugdan ang pagpatuman sa duha ka adlaw nga liqour ban subay sa barangay ug Sangguniang Kabataan election kagahapong adlawa.

Sa mga establismento ning siyudad adunay gipahimutang nga mga poster pagpahinumdum sa duha ka adlaw nga liquor ban ug kung mahimo dili una mopalit og ilimnon nga makahubog.

Si Police Officer 3 Releyo Mustar sa Police Station 1 (PS1) sa Divisoria nibutyag sa Sun.Star Superbalita nga sa ilang area dunay nasapon nga nagdala og ilimnong makahubog kinsa hubog usab kagahapon mga alas 2:00 sa kadlawon.

Giila ang nadakpan nga mao si Eleazer Mutya, hingkod ang edad taga Isla de Oro ning siyudad.

Samtang ang Police Station 6 (PS6) sa Puerto maoy labing daghan nga nasikop diin mokabat ngadto sa lima ka mga tawo.

Si SPO1 Ronilo Cubilo sa PS10 nibutyag nga ila ra usab nga gibuhian tungod kay ang maong grupo nanagayo man og pasaylo ug wala masayod nga adunay mga kasupakan panahon niini. Gawas pa nga dili pamilyar ang maong Comelec resolution.

Samtang sa PS4 sa Carmen dunay usa ka tawo nga nasikop ug usa usab ka tawo sa PS5 sa Macabalan.

Gituohan sa kapolisan nga dili na kini madugangan pa labina nga maayo ang pagpasabot sa mga sakop sa media kalabot niining resolusyon.

Kahinumduman nga ang liquor ban mao ang pagdili sa bisan kinsa nga tawo nga namaligya, nihanyag ug nipalit sa ilimnong makahubog labina gyod sa mga polling places atol sa piniliay.

Samtang ang mga establismento o mga hotel nga nag-negosyo niini mahimong exempted kung kini duly certified sa Department of Tourism isip tourist-oriented ug naandan na nga namaligya ug ni-cater og mga foreign tourists.

Ang mga foreign tourist lamang nga nag-inom sulod sa hotels o bisan unsang establismento ang exempted gikan niining probisyon. (Stephanie V. Berganio)