MAO kini ang kasagarang reklamo sa akong mga kaila nga ningsalmot sa eleksyon sa Barangay ug Sanguniang Kabataan kagahapon. Ang nakaparat kay usa sa giingong kampo nga nagpabahag kwarta naa sa kampo sa administrasyon nga ilaha kang Presidente Noynoy

Aquino.

Makasubo gyud nga wa makatuhop ngadto sa mga tigsuporta ni P-Noy ang pagsalikway sa paagi sa pagkampanya nga hugaw ug moresulta hinuon sa dugang pang kurapsyon kay kinahanglang bawion man ang kantidad nga gilabay kuno aron makadaog.

Hinuon, sayo pa karong nagsulat ko sa akong lindog ug di pa nato matino kon nisalir ba ang pagpamalit o nidaghan na ang mga tawo nga di mapalit sa panahon sa eleksyon.

Makapagaan sa akong dughan kon mapildi ang namalit kay nagpasabot lang kini nga nagpadulong na kita sa kausaban.

Tan-awon sab nato kon nilampos ba sa ilang mga tinguha ang atong mga kaila nga mga sakop sa media nga tiunay nga naninguha alang sa kaayuhan sa barangay. Tan-awon nato kon hatagan ba sa mga botante ang mga kandidato nga way daghang kwarta apan tininuod ang pagserbisyo o pilion ba nila ang mga gusto lang mangwarta sa poder aron makaginansya sa nagasto sa piliay.

Mangayo lang ko og pasensya ni Grace Baquero, kandidato alang sa pagka konsehal sa barangay sa Punta Princesa sa Syudad sa Sugbo ug anak sa atong higala nga lider sa mga reporter nga si Ely Baquero. Ako man gud kini nga nasulat nga nidagan alang sa SK sa lindog nga Iningles diha sa Sun.Star Cebu.

SK

Manghinaot lang gyud ko nga mopatigbabaw ang idealismo sa mga batan-ong nangsalmot karon sa Sanguniang Kabataan bisan pa man sa mga tinunto nga gipahigayon sa mga tiguwang na diha sa lain-laing mga barangay.

Daghan man gud ang atong nahipos nga taho nga dunay mga ginikanan mismo ang nangunay sa pagpamalit og mga boto aron lang gyud modaog ang ilang anak.

Tuyo man unta gud sa SK nga mogamit sa idealismo sa mga batan-on aron maoy mohinahinay sa pagreporma sa atong sistema sa politika.

Ang nahitabo kay kining atong mga katiguwangan man ang moduso sa ilang mga anak nga mahimong kurakot.

Mao nga igo na lang ako sa panghinaot nga mopatigbabaw gyud sa ngadto-ngadto ang kaligdong niining atong mga kabatan-onan.

MALINAWON

Bisan pa man sa kagubot didto sa Punta Engano, makaingon kita nga sa heneral malinawon ang piliay kagahapon.

Ang problema lang mao kining kapalpakan sa Commission on Election (Comelec) sa pagdala sa mga balota ngadto sa tanang mga presinto sa tukmang oras.

Ambot niining Comelec gyud nga sa panahon lang man unta sa eleksyon ang ilang trabaho ug hangtod karon, palpak lang gihapon. Tungod niini, daghang mga presinto ang dugay nakasugod sa pagpasulod og mga botante. Gani, duna pay giingong na-failure of election ug ipahigayon karong adlawa. Bisan pa man ning tanan, napakita ni Pres. Aquino nga sakto siya nga ipadayon gyud kini ug di magpadala sa way klarong rason.