MIRESULTA na gyod kining ka-inutil aning taga Commission on Elections (Comelec) central office. Wala magkadimao ang pagpahigayon sa barangay ug Sangguniang Kabataan (SK) elections kagahapon sa pipila ka mga lugar. Posible man gani  nga ma-uswag ang piniliay karong adlawa sa pipila ka mga lugar gumikan kay wala magkadimao ang eleksiyon.

Dinhi lang sa Cebu province, niadtong Domingo sa gabii na nangabot ang mga election materials. Unya gikuha pa sa mga city ug municipal treasurer sa Provincial Treasurer’s Office aron dad-on sa ilang tagsa-tagsa ka mga lugar. Ang uban mibiyahe pa ug pipila ka oras. Buntag na nag-abot sa ilang lugar ug wala dayon kini mahatag usab sa mga sakop sa board of election inspectors. Ang uban udto na nagsugod ang botasyon. Kon adunay mabasol aning palpak nga eleksiyon mao ang Comelec sa kauluhan kay nadelatar ang pag-imprinta sa mga balota.

DUGOON

Gawas sa dugoon nga hitabo sa Punta Engano, Lapu-Lapu City, walay lain mga insidente nga nahitabo nga matawag nato nga election-related incident. Patay ang usa ka supporter sa usa ka kandidato sa pagkakapitan sa maong barangay human kini gi-ambush kagahapon sa kadlawon. Samdan usab ang usa ka pulis ug duha ka barangay tanod. Matod pa nga ang biktima si Demeterio Sumalpong uban ni PO3 Dennis Carillo gibanhigan sa mga tanod sa maong barangay.

Nakabawos sa pagpusil si Carillo hinungdan nga nasamdan usab ang duha ka tanod. Si Sumalpong supporter ni Angel Rodriguez, nagpapili pagkakapitan. Kinsa man ang nagsugo sa mga tanod nga banhigan si Sumalpong. Ang asawa usab si Carillo nagpapili pagkakonsihal ubos sa line-up ni Rodriguez. Ang isig ka kampo nangangkon nga sila maoy  gi-unhan. Akong nahibaw-an nga ang ubang tanod diha sa Punta Engano mga kanhi scout rangers nga sakop nila ni Choy Dela Sala ug Joe Sabandija.

Nagkinahanglan ni ug lawom-lawom nga imbestigasyon. Pastilan no, barangay election lang magpatay pa gyod.

PINALITAY/KIDNAP

Bisperas sa eleksiyon, daghan kog nadawat nga taho nga namalit ang ubang mga kandidato. Gani aduna man gyoy pulitiko nga nangunay mismo pagkampaniya sa ilang gipaburan nga mga kandidato. Ang mga SK gipang-kidnap na sa mga mikandidato. Ang uban didto gidala sa mga beach resort. Hay, ambot ug kanus-a pa ni mawala ang maong matang sa pagpanikas panahon sa eleksiyon. (bgnalzaro@gmanetwork.com)