HUGOT nga seguridad ang gipatuman sa Punta Engaño Elementary School, dabkayan sa Lapu-Lapu tungod nahitabong pinusilay sa mga tawo sa duha ka mga kandidato sa pagka kapitan sa Brgy. Punta Engaño.
Gipangunayan ni Atty. Ferdinand Gujilde, election officer sa Commission on Elections (Comelec) sa Lapu-Lapu sa pagbantay ang dapit inabagan sa 50 ka mga sakop sa kapulisan ug militar nga maoy iyang gisaad sa mga Board of Election Teller (BET).
Nabalaka si Gujilde sa dihang nipadangat og petition letter ang mga BET ug Board of Canvassers nga mang-withdraw sa ilang assignment nga moalagad sa piniliay sa Punta Engaño.
Apan sa higayon nga isaad sa Comelec nga hatagan sila og kasiguroan sa ilang nga seguridad sama pag-deploy og kapulisan, pagbalhin sa botasyon sa mas luwas nga lugar o ang pag-postpone sa piniliay sa laing adlaw, padayon sila sa pag-alagad.
“Due to the existing status of the events taking place in Brgy. Punta Engano, as well as to the threats to the lives of the BETs assigned in the aforementioned polling place, we, the undersigned have finally decided to withdraw from further assignments,” tipik sa maong suwat hangyo sa mga magtutudlo.
Si PSSupt. Mariano Natuel Jr. hepe sa Lapu-Lapu City Police Office (LLCPO) ingon man si Gujilde nakahukom nga madayon ang piniliay hinungdan nga nipadala og mga sakop sa Special Weapons and Tactics (SWAT) ingon man ang Philippine Air Force (AFP) sa pagbantay sa maong lugar.
Pasado na alas 10:00 kagahapon sa buntag nakasugod ang botasyon sa Punta Engano diin matag polling precinct adunay duha ka mga pulis magbantay.
“Wa ni (pagpamanhig) ma-anticipate. Karon lang ni nga adunay hitabo nga ingon ani. This becomes a history. So, bantayanan ni sunod election,” matod ni Gujilde.
Samtang si Police Regional Office (PRO-7) Director Ager Ontog Jr. niumol na og task force aron mosusi sa insidente.
Si Ontog nibutyag sa Sun.Star Superbalita nga ang task force pangulohan ni Sr. Supt. Ramon Rafael, director sa Criminal Investigation and Detection Group (CIDG-7).