PULIS ug giingong kanhi mga Scout Ranger sa Philippine Army apan karon mga tanod na sa Brgy. Punta Engaño, dakbayan sa Lapu-Lapu nagpinusilay kagahapon sa kaadlawon.

Usa ang patay ug tulo ang nangaangol, lakip na sa pulis, sa insidente nga may kalambigitan sa piniliay kagahapon nga maoy nakaingon sa pagkalangay sa pagbotar tungod kay nangahadlok na ang mga magtutudlo.

Sa imbestigasyon sa kapulisan, pasado alas 2 sa kadlawon nahitabo ang pinusilay sa may sityo Lupa, mga 100 ka metros gikan sa balay sa kandidato pagka barangay kapitan nga si Angel Rodriguez.

Siya ang niatbang kang incumbent Brgy. Captain Lourdes Ibang.

Ang kampo ni PO3 Diogines Carillo, sakop sa Liloan Police Station apan nagpuyo sa barangay Punta Engaño, kinsang asawa kandidata sa‘pagka-konsehal ubos ni Rodriguez, nipasangil nga sila maoy gi-ambush sa mga tawo nga luwan sa usa ka Grandia van, kolor puti.

Giingong si Carillo, kinsa nagsakay sa motorsiklo, nibawos sa pagpusil hinungdan nga nahitabo ang pinusilay.

Ang iyang drayber nga si Demetrio Sumalpong, kinsa nagsunod kaniya niadtong higayuna sakay sa laing motorsiklo aron mopalit unta silag tubig sa gawas, maoy naigo sa bala.

Maayong pagkaigo sa dughan ug ubang bahin sa lawas ni Sumalpong hinungdan nga siya namatay diha-diha.

Tungod sa pagbawos ni Carillo, nangaangol sila sii Remegio Bantilo ug Alejandro Veloria deputy chief sa tanod, kinsa pulos anaa karon sa Mactan Doctors Hospital.

Si Bentilo samdan sa tuong dughan samtang si Beloria sa paa.Si Carillo nasamdan usab sa iyang tuong kamot apan giingong tapsing lang mao nga wa madala sa tambalanan.

Laing mga tanod ang giingong apil sa pagpamusil giilang mao sila si Bienvenido Tenorata, Janito Dumangin, Ernior Siyang ug Nicandro Rodillas.

Nakuha gikan sa crime scene ang kapin sa 90 ka mga kabhang sa nagkadaiyang matang sa bala apan kadaghanan niini giingong gikan sa baby armalite rifle ug aduna usay kabhang sa kalibre .45 nga pistola.

Hinuon ang mga tanod ningpasangil usab nga sila ang gi-ambush sa grupo ni Carillo ug mga kauban.

Igo lang silang ningtubag sa alarma nga matod pa adunay mga tawo nga gihakot ni Rodriguez nga tigpaluyo ni Ibang.

Giingong gibutangan og ink ang ilang tudlo bugti sa paghatag og P100 aron din a makabotar sa eleksyon.

Apan sa ilang pag-abot gi-ambush sila sa grupo ni Carillo.

Apan ang imbestigador sa kaso nga si SPO2 Rolito Jumao-as niingon nga sa pasiuna nilang pakisusi di ambush ang nahitabo kon di usa gayod ka pinusilay sa duha ka mga habig.Mao kini karon ang ilang gisusi.

Ang homicide nag-request na sa PNP Crime Laboratory nga ipa-paraffin test ang mga tawong nalambigit.